नववी प्रवेशासाठी नवोदय विद्यालयाच्या अर्ज प्रक्रियेला प्रारंभ!

सोलापूर : जवाहर नवोदय विद्यालय समिती (Jawahar Navodaya Vidyalaya) ने लेटरल एंट्री स्कीम अंतर्गत नववीच्या वर्गात प्रवेशासाठी अर्ज प्रक्रिया सुरू केली आहे. ज्या विद्यार्थ्यांना नववीमध्ये प्रवेश घ्यावयाचा आहे, त्यांनी एनव्हीएसची अधिकृत साईट navodaya.gov.in वर ऑनलाइन अर्ज करू शकतात. या वर्गासाठी घेण्यात येणाऱ्या जवाहर नवोदय विद्यालय निवड चाचणीसाठी नोंदणी प्रक्रिया 31 ऑक्‍टोबर 2021 पर्यंत आहे. शेवटच्या तारखेनंतर कोणतीही विनंती स्वीकारली जाणार नाही. विद्यार्थ्यांनी लक्षात घ्यावे की, या परीक्षेस फक्त तेच विद्यार्थी उपस्थित राहू शकतात, जे 2021-22 च्या शैक्षणिक (Education) सत्रादरम्यान सरकारी मान्यताप्राप्त शाळांमधून इयत्ता आठवीमध्ये शिकत आहेत.

इयत्ता नववीच्या प्रवेशासाठी असा करा ऑनलाइन अर्ज

सर्वप्रथम नवोदय विद्यालयाच्या अधिकृत साईट navodaya.gov.in वर जावे. त्यानंतर मेन पेजवर उपलब्ध जेएनव्ही वर्ग 9 प्रवेश 2021 चाचणी लिंकवर क्‍लिक करा. आता तुमच्यासमोर एक नवीन पेज उघडेल, जिथे उमेदवारांना स्वतःची नोंदणी करावी लागेल किंवा खात्यात लॉग इन करावे लागेल. आता अर्ज भरा आणि अर्ज फी भरा. त्यानंतर एकदा सबमिट करा वर क्‍लिक करा. आता तुमचा अर्ज सबमिट झाला आहे. नंतर पुष्टीकरण पेज डाउनलोड करा आणि पुढील गरजेसाठी त्याची हार्ड कॉपी ठेवा.

9 एप्रिल 2022 ला होणार प्रवेश परीक्षा

इयत्ता नववीच्या प्रवेशासाठी निवड चाचणी 9 एप्रिल 2022 रोजी होणार आहे. ही परीक्षा संबंधित जिल्ह्याच्या जवाहर नवोदय विद्यालयात / NVS द्वारे वाटप केलेल्या इतर कोणत्याही केंद्रावर घेतली जाईल. परीक्षेचा कालावधी 2 तास 30 मिनिटे राहणार आहे. परीक्षेचे माध्यम इंग्रजी / हिंदी असेल आणि विद्यार्थ्यांना ओएमआर शीटमध्ये उत्तर द्यावे लागेल.