SET Exam Result 2023 : सेट परीक्षेचा ‘अधिकृत’ निकाल अखेर जाहीर

पुणे : महाराष्ट्र आणि गोवा राज्यातील सहाय्यक प्राध्यापक पदाच्या पात्रतेसाठी सावित्रीबाई फुलेपुणे विद्यापीठाकडून मार्च २०२३ मध्ये घेतलेल्या सेट परीक्षेचा निकाल जाहीर करण्यात आला. या परीक्षेत केवळ ६.५९ टक्के विद्यार्थी पात्र ठरले आहेत. परिक्षेचा हा निकाल दोन दिवस आधीच फुटला होता. त्यानंतर आता विद्यापीठाने निकाल अधिकृतरीत्या मंगळवारी जाहीर झाला.

या परीक्षेसाठी महाराष्ट्र आणि गोव्यातून एक लाख १९ हजार ८१३ विद्यार्थ्यांनी नोंदणी केली होती. त्यातील एक लाख एक हजार २५७ विद्यार्थ्यांनी परीक्षा दिली. त्यातील सहा हजार ६७६ (म्हणजेच ६.५९ टक्के) विद्यार्थ्यांनी पात्र ठरले आहेत.

१७ तृतीयपंथी विद्यार्थ्यांनी ही परीक्षा दिली. त्यातील दोन विद्यार्थी पात्र ठरले आहेत. या परीक्षेसाठी पुणे केंद्रातून १९ हजार ३६८ विद्यार्थ्यांनी नोंदणी केली होती. त्यातील १५ हजार ७०९ विद्यार्थ्यांनी परीक्षा दिली. एकूण ७१ विषयांसाठी ही परीक्षा झाली.