आरटीई २५ टक्के राखीव जागांवरील प्रवेशाची ऑनलाइन सोडत बुधवारी होणार जाहीर

पुणे : शिक्षण हक्क कायद्यानुसार (आरटीई) खासगी शाळांमधील २५ टक्के राखीव जागांवरील प्रवेशासाठी राबविण्यात येणाऱ्या प्रवेशाची ऑनलाइन सोडत (लॉटरी) बुधवारी (ता.३०) दुपारी चार वाजता महाराष्ट्र राज्य शैक्षणिक संशोधन व प्रशिक्षण परिषदेच्या सभागृहात काढण्यात येणार आहे.

आरटीईनुसार आर्थिकदृष्ट्या दुर्बल आणि वंचित घटकातील विद्यार्थ्यांना खासगी शाळांमध्ये २५ टक्के जागा राखीव ठेवल्या जातात. या जागांवरील प्रवेशासाठी प्राथमिक शिक्षण संचालनालयामार्फत केंद्रीय पद्धतीने ऑनलाइन प्रवेश प्रक्रिया राबविण्यात येते. प्रवेश प्रक्रियेंतर्गत शैक्षणिक वर्ष २०२२-२३ करिता राज्यातील जवळपास ९ हजार ८८ शाळांमधील तब्बल एक लाख दोन हजार २२ जागांकरिता सुमारे दोन लाख ८२ हजार ७७६ अर्ज आले आहेत. प्रवेश प्रक्रियेमार्फत मुलांच्या प्रवेशासाठी यंदा मोठ्या प्रमाणात अर्ज दाखल झाले आहेत. तर पुणे जिल्ह्यातील ९५७ शाळांमधील १५ हजार १३२ जागांकरिता तब्बल ६२ हजार ९५६ अर्ज आले आहेत. या प्रवेश प्रक्रियेला १६ फेब्रुवारीपासून सुरवात झाली होती. प्रवेश प्रक्रियेत अर्ज भरल्यानंतर आरटीई प्रवेशाच्या सोडत कधी लागणार याची प्रतीक्षा लाखो पालकांना होती, आता अखेर ही परीक्षा संपणार आहे.

‘‘शैक्षणिक वर्ष २०२२-२३ करिता आरटीईनुसार २५ टक्के राखीव जागांवरील प्रवेशासाठी ऑनलाइन सोडत बुधवारी (ता.३०) जाहीर करण्यात येत आहे. यावेळी प्राथमिक शिक्षण संचालक दिनकर टेमकर यांच्यासह अन्य अधिकारी उपस्थित राहतील.’’ अशी माहिती प्राथमिक शिक्षण संचालनालयाचे सहसंचालक राजेश क्षीरसागर यांनी दिली.