राज्य बॅंकेच्या भरतीला पाच हजार परीक्षार्थी

पुणे - राज्य सहकारी बॅंकेची सेवकभरती प्रक्रिया सुरू झाली असून, रविवारी (ता. २४) पार पडलेल्या ऑनलाइन परीक्षेस पाच हजार १५७ परीक्षार्थी उपस्थित होते. राज्यातील सातही विभागांत भरती प्रक्रिया पार पडत आहे.

राज्य बॅंकेने लेखनिक पदापासून ते अधिकारी पदापर्यंत ऑनलाइन परीक्षा घेतल्या आहे. इन्स्टिट्यूट ऑफ बॅंकिंग पर्सोनेल सिलेक्शन (आयबीपीएस) या केंद्र सरकारच्या संस्थेकडून ही परीक्षा घेण्यात आल्याचे, प्रशासक विद्याधर अनास्कर यांनी सांगितले. ते म्हणाले, ‘बॅंकेच्या उज्ज्वल भविष्यासाठी संगणकीकरणाच्या युगात तंत्रस्नेही कर्मचाऱ्यांची भरती होणे आवश्यक होते.

बॅंकेने लेखनिक व अधिकारी या संवर्गाच्या रिक्त पदासाठी ही भरती प्रक्रिया सुरू केली आहे. सेवकांची संख्या एक हजार १५० ने कमी होऊन देखील बॅंकेने केवळ १९५ जागा भरण्याचा निर्णय घेतला आहे. यामुळे प्रशासकीय खर्चात १८० कोटींची बचत होईल.’ परीक्षेत गैरप्रकार होण्याची सुतराम शक्यता नाही. त्यामुळे कोणीही अशा अफवांवर विश्वास ठेवू नये, असे अनास्कर यांनी स्पष्ट केले.