Education : पदवीच्या प्रवेशापूर्वी करा एनईपीचा अभ्यास

पुणे - बारावीच्या परीक्षांनंतर विद्यार्थ्यांना वेध लागतात ते पुढल्या प्रवेशांचे. कोणत्या अभ्यासक्रमाला प्रवेश घ्यायचा, कोणतं महाविद्यालय निवडायचं किंवा कोणत्या शहरात उच्च शिक्षण घ्यायचे... असे एक ना अनेक प्रश्न विद्यार्थ्यांसमोर असतात. पण यंदा जर तुम्ही पदवीला प्रवेश घेणार असाल तर नविन राष्ट्रीय शैक्षणिक धोरणाचा नक्की अभ्यास करा. कारण पदवी आता चार वर्षांची होत असून, तुम्ही निवडलेल्या विषयांमुळे तुमचे करिअर घडणार आहे.

शैक्षणिक वर्ष २०२४-२५ पासून विद्यापीठांशी संलग्न महाविद्यालयांमध्ये पदवी अभ्यासक्रमापासून एनईपी लागू होत आहे. त्यामुळे पदवी आता चार वर्षांची होणार असून, आंतरविद्याशाखीय अभ्यासाची संधी विद्यार्थ्यांना उपलब्ध असेल. आंतरवासिता (इंटर्नशिप), हँड्स ऑन ट्रेनिंग, ऐच्छिक विषय, मल्टिपल एन्ट्री- मल्टिपल एक्झिट, ॲकॅडमिक बॅंक ऑफ क्रेडिट्स, अशा एक ना अनेक नव्या संकल्पना पदवीच्या अभ्यासक्रमांत अंतर्भूत झाल्या आहेत.

आजवर अभ्यासक्रम किंवा महाविद्यालयाभिमूख असलेले शिक्षण आता विद्यार्थी केंद्रित असणार आहे. विद्यार्थ्याने निवडलेले विषय, औद्योगिक कार्यानुभव, प्राप्त केलेल श्रेयांक आणि त्यातून मिळालेली कौशल्य त्याच्या करिअरमध्ये महत्त्वपूर्ण भूमिका बजावणार आहे.

विद्यार्थ्यांनी काय करावे?

- एनईपीतील नव्या बदलांची माहिती घ्यावी. महाविद्यालयांच्या माहिती पुस्तिकेत त्याचा अंतर्भाव आहे का, हे तपासावे.

- आपल्याला ज्या श्रेत्रात करिअर करायचे आहे, त्याला पूरक अभ्यासक्रम निवडावा.

- त्याच क्षेत्रातील आधुनिक व सुसंगत इंटर्नशिप देणाऱ्या महाविद्यालयांची चौकशी करावी

- दर्जेदार ऐच्छिक विषय, आंतरवासिता आणि हॅंड्स ऑन ट्रेनिंग उपलब्ध असलेल्या महाविद्यालयांना प्राधान्य द्यावे

- संबंधित महाविद्यालयातील एनईपी कक्षाला भेट देऊन, अभ्यासक्रमाची सविस्तर माहिती मिळवावी

महाविद्यालयांना त्यांच्या माहिती पुस्तिकेमध्ये एनईपीच्या वैशिष्ट्यांचा अंतर्भाव असावा. तसेच विद्यार्थ्यांना मार्गदर्शन आणि सहाय्यासाठी प्रत्येक महाविद्यालयात एनईपीकक्षाची रचना करायला सांगितले आहे. पदवीच्या प्रवेशापूर्वी विद्यार्थ्यांनी एनईपीबद्दल माहिती घेणे गरजेचे आहे.

- डॉ. नितीन करमळकर, अध्यक्ष, राज्य सुकाणू समिती, एनईपी