Ganpati Visarjan : मिरवणुकीत 'लेझर शो'चे Video Recording करत असाल तर वेळीच सावध व्हा, अन्यथा पडू शकतं महागात!

सांगली : गणेश मंडळांच्या मिरवणुकीत (Ganpati Visarjan Miravnuk Sangli) साऊंड सिस्टिम, डीजे ठरवलाय आणि सोबतीला लेझर शोसुद्धा... साहजिकच, तरुणाईला आपल्या मंडळाच्या रंगारंग कार्यक्रमाचे व्हिडिओ चित्रिकरण करण्याचा मोह होतो. मात्र, हा मोह खिशाला कात्री लावणारा ठरत आहे.

लेझर शोचे चित्रिकरण करताना दहामागे किमान आठ कॅमेरे खराब झाल्याची प्राथमिक माहिती समोर येत आहे. मोबाईल दुरुस्ती स्टोअर आणि कंपनी सर्व्हिस सेंटरमध्ये गेल्या दोन दिवसांत हे ग्राहक वाढले आहेत. मोबाईल कसा वापरावा, याबाबतचे प्राथमिक ज्ञान असलेल्या लोकांची संख्या अत्यंत कमी आहे.

हजारो रुपये किमतीचे मोबाईल (Mobile Camera) कसे जपावेत, याबाबत साक्षरता नाही. त्याचाच फटका यंदा गणेशोत्सवात मोठ्या प्रमाणात बसतो आहे. लेझर शोची किरणे अत्यंत तीव्र असतात. मोबाईल कॅमेरा ती सहन करू शकत नाही. त्याने थेट कॅमेऱ्याच्या ‘इमेज सेंसर’ला दणका बसतो. हा सेंसरच कॅमेऱ्याचे मुख्य कार्य करत असतो.

त्यामुळे कॅमेरा पूर्ण खराब होतो किंवा अंशतः काही अडचणी निर्माण होतात. त्यात दुरुस्तीची शक्यता कमी असते. अशा वेळी कॅमेरा बदलून घेणे, हाच पर्याय उरतो. अर्थातच, कॅमेऱ्याच्या किमतीच्या प्रमाणात कॅमेऱ्याची किंमत असते आणि ती हजारांच्या पटीतच असते. तेव्हा मोबाईल वापरकर्त्यांना अपुऱ्या माहितीची किंमत चुकवावी लागत आहे.

लेझर शोसाठी वापरली जाणारी यंत्रणा अत्यंत तीव्र आणि गरम किरणे निर्माण करते. त्यांची तीव्रता सहन करण्याची क्षमता मोबाईल कॅमेऱ्यांची नसते. एखादा फोटो घेतला तर अडचण होत नाही, मात्र सलग चित्रिकरण केल्यास कॅमेरा खराब होऊ शकतो. शक्यतो, थेट किरणांपुढे जाऊन चित्रिकरण करू नये.

- अजय नानवाणी, मोबाईल शोरूम मालक

जगातील टॉप ब्रँड असलेल्या कंपनीचा मोबाईल वापरतो. त्याने मिरवणुकीत व्हिडिओ चित्रिकरण करत असताना कॅमेरा खराब झाला. त्यावर उभ्या, आडव्या रेषा दिसत आहेत. फोटो काढणेही शक्य नाही. कॅमेरा बदलणे हाच पर्याय आहे.

- ओंकार पाटील, मिरज