अफगाणिस्तानात कुत्र्यांना चारली जाताहेत ड्रग्ज, हेरॉईन

अफगाणिस्तानमध्ये (Afghanistan) तालिबानची (Taliban) सत्ता आल्यापासून सर्वसामान्यांचं जगणं अत्यंत कठीण झालंय. पण, आता तिथल्या कुत्र्यांचेही (Dogs) वाईट दिवस सुरू झाल्याचे दिसत आहे. अफगाणिस्तानची राजधानी काबुलमधून काही धक्कादायक फोटो समोर आली आहेत. ते पाहून तुम्हालाही आश्चर्य वाटेल. येथील लोक कुत्र्यांना ड्रग्ज (Drugs) आणि हेरॉईन देताना दिसत आहेत. एवढंच नाही, तर ते अनेकवेळा कुत्र्यांना अंमली पदार्थांचं सेवन करण्यास भाग पाडत आहेत.

अफगाणिस्तानची राजधानी काबूल (Kabul) येथून ही घटना समोर आलीय. 'डेली मेल'च्या वृत्तानुसार, येथील कुत्र्यांनाही अंमली पदार्थ दिले जात आहेत. त्यामुळं त्यांची प्रकृती गंभीर होत आहे. यामागचं कारणही आता समोर आलंय. ते खूपच धक्कादायक आहे. कडाक्याच्या थंडीत स्वत:ला उबदार ठेवण्यासाठी लोकांकडं कोणतीही पर्यायी व्यवस्था नसल्याचे येथील नागरिक सांगताहेत. अशा स्थितीत लोक ड्रग्ज घेऊन स्वतःहून उंच राहत असून शरीराच्या उष्णतेसाठी ते कुत्र्यांना स्वतः जवळ झोपवत आहेत.

अफगाणिस्तानातील काही भागात ड्रग्ज आणि हेरॉईन अतिशय स्वस्तात मिळतात, त्यामुळं भिकारी आणि बेघर लोकही ते विकत घेऊ शकतात, असंही या अहवालात नमूद करण्यात आलंय. शहरात हेरॉईनच्या नशेत लोक आढळून येत असून ते रिकाम्या बाटल्यांमधून भटक्या कुत्र्यांना अंमली पदार्थ देत ​​आहेत. ड्रग्ज घेतल्यानंतर, इकडं-तिकडं फिरणारी कुत्री शांत होतात आणि एका जागी शांत बसतात, असंही स्पष्ट झालंय. एकीकडं तालिबान ड्रग्ज संपवण्याची भाषे करते, तर दुसरीकडे कुत्र्यांना ड्रग्ज देताना दिसत आहे.