BBC चे अध्यक्ष रिचर्ड शार्प यांनी दिला राजीनामा; बोरिस जॉन्सन यांच्यामुळे आले अडचणीत

बीबीसीचे अध्यक्ष रिचर्ड शार्प यांनी राजीनामा दिला आहे. एका अहवालामुळे त्यांना राजीनामा द्यावा लागला असल्याची माहिती मिळत आहे. ते जून अखेरपर्यंत या पदावर राहतील.

बीबीसीचे अध्यक्ष रिचर्ड शार्प यांनी आपल्या पदाचा राजीनामा दिला आहे. सरकारी नियुक्तांबद्दलच्या नियमांचा त्यांनी भंग केला, असं सांगणारा एक अहवाल सादर करण्यात आला होता. या अहवालानंतर त्यांनी राजीनामा दिला आहे. ब्रिटनचे माजी पंतप्रधान बोरिस जॉन्सन यांना कर्ज मिळवून देण्यात मदत केल्याचंही या अहवालात म्हटलं आहे.

राजीनामा देताना रिचर्ड शार्प म्हणाले, "बीबीसीच्या हिताला प्राधान्य द्यायचं हे मी ठरवलं आहे. म्हणून मी आज सकाळी बीबीसीच्या अध्यक्षपदाचा राजीनामा परराष्ट्रमंत्री आणि संचालक मंडळाकडे दिला आहे."

२०२० साली ब्रिटनचे तत्कालीन पंतप्रधान बोरिस जॉन्सन यांना त्यांनी आर्थिक मदत देऊ केली होती. याबद्दल कॅबिनेट सचिव सायमन केस आणि जॉन्सन यांचे चुलत भाऊ सॅम ब्लिथ यांची बैठक घेतल्याचंही शार्प यांनी मान्य केलं आहे.