Video: जखम भरुन निघणार अवघ्या काही सेंकदात; वैज्ञानिकांचा क्रांतीकारी शोध?

वॉशिंग्टन- अमेरिकेच्या बायोमेडिकचे विद्यार्थी आणि सिडनी युनिव्हर्सिटीच्या विद्यार्थ्यांनी सर्जिकल ग्लुचा एक भन्नाट शोध लावला आहे. त्यांच्या या शोधामुळे अवघ्या काही सेंकदात जखम भरण्यास मदत होणार आहे. त्यामुळे वैद्यकीय क्षेत्रातील हा अत्यंत महत्त्वाचा आणि उपयोगी शोध असल्याचं मानलं जात आहे. 

इलॅस्टिक आणि अॅडेसिव्ह ग्लू अगदी कमी वेळात एखादी जखम भरुन काढू शकते. विशेष म्हणजे यासाठी टाके लावण्याची अजिबात गरज नाही. ग्लूला मेट्रो असं नाव देण्यात आले असून अवघ्या 60 सेकंदात यामुळे जखम भरुन येते. जेलसारखा असणारा हा पदार्थ ultraviolent light (UV) ने सक्रिय केला जातो. जखमेवर हे ग्लू लावल्यानंतर काही काळातच ते जखम भरुन काढते. 

ग्लूचा उंदीर आणि डुकरांवर यशस्वीपणे प्रयोग करुन पाहण्यात आला आहे. लवकरच याची मानवावर चाचणी घेतली जाणार आहे. biocon च्या प्रमुख किरन मुजुमदार यांनी या संधोधनाचा व्हिडिओ शेअर केला आहे. यात कशा पद्धतीने अवघ्या काही सेंकदात जखम भरली जाऊ शकते हे दाखवण्यात आले आहे. मेट्रो ग्लूची इलॅस्टिसिटी जखम भरुन काढण्यात महत्त्वाची भूमिका बजावत असते. विद्यार्थ्यांनी केलेले हे संशोधन मानवावरही यशस्वी ठरल्यास हा एक क्रांतिकारी शोध ठरणार आहे.