India-Afghan Relation : पाकिस्तानला नाहीतर अफगाणिस्तानला भारताची मदत तेही...

India Wheat Help To Afghanistan : भारताने चाबहार बंदरातून 20,000 मेट्रिक टन गहू अफगाणिस्तानला पाठवण्याची घोषणा केली. मंगळवारी दिल्लीत अफगाणिस्तानवरील भारत-मध्य आशिया संयुक्त बैठकीत ही घोषणा करण्यात आली.

या बैठकीत यजमान भारताव्यतिरिक्त मध्य आशियातील 5 देश, कझाकिस्तान, किर्गिस्तान, ताजिकिस्तान, तुर्कमेनिस्तान आणि उझबेकिस्तानचे विशेष वरिष्ठ अधिकारी सहभागी झाले होते.

UNVFP च्या भागीदारीत भारताने अफगाणिस्तानला 20 हजार मेट्रिक टन गव्हाची मदत जाहीर केली आहे. विशेष म्हणजे ही मदत काबूलला पाकिस्तानच्या माध्यमातून नाही तर इराणच्या चाबहार बंदरातून दिली जाणार आहे.

भारत आणि पाच मध्य आशियाई देशांनी मंगळवारी (07 मार्च) दहशतवाद आणि अतिरेक्यांच्या प्रादेशिक धोक्यांचा एकत्रितपणे सामना करण्याविषयी चर्चा केली.

यादरम्यान अफगाणिस्तानच्या भूमीचा वापर दहशतवादी प्रशिक्षणासाठी किंवा अशा कोणत्याही कारवायांच्या नियोजनासाठी होऊ नये, यावर भर देण्यात आला. दरम्यान, अफगाणिस्तानला मदत करणारी गव्हाची खेप पाकिस्तानमार्गे न पाठवता इराणमार्गे पाठवली जाईल, असेही ठरले.

बैठकीत, भारताने घोषणा केली आहे की ते इराणच्या चाबहार बंदरातून अफगाणिस्तानला मदत म्हणून 20,000 टन गहू पुरवण्यासाठी UN जागतिक अन्न कार्यक्रम (WFP) च्या भागीदारीत काम करेल.

यापूर्वी भारताने सुमारे 40,000 टन गहू पाकिस्तानमार्गे रस्त्याने पुरवठा केला आहे, परंतु त्यात अनेक अडथळ्यांचा सामना करावा लागला.

या बैठकीला भारत, कझाकिस्तान, किर्गिस्तान, ताजिकिस्तान, तुर्कमेनिस्तान आणि उझबेकिस्तानचे विशेष दूत आणि वरिष्ठ अधिकारी उपस्थित होते.

जागतिक अन्न कार्यक्रम (WFP) आणि युनायटेड नेशन्स ऑफिस ऑन ड्रग्ज अँड क्राइम्स (UNODC) मधील देशांचे प्रतिनिधी देखील यात सहभागी झाले होते.

संयुक्त निवेदनात म्हटले आहे की बैठकीत सर्व अफगाण लोकांच्या हक्कांचा आदर करणारी आणि शिक्षणाच्या प्रवेशासह महिला, मुली आणि अल्पसंख्याक गटांच्या सदस्यांना हमी देणारी "सर्वसमावेशक आणि प्रातिनिधिक राजकीय रचना" तयार करण्यावर भर देण्यात आला.

गेल्या वर्षी डिसेंबरमध्ये, अफगाणिस्तानमधील महिलांना विद्यापीठात जाण्यावर बंदी घालण्याच्या तालिबानच्या निर्णयावर टीका करणाऱ्या अनेक प्रमुख देशांमध्ये भारताचा समावेश होता.

निवेदनात असेही म्हटले आहे की सल्लामसलत दरम्यान अधिकार्‍यांनी दहशतवाद, अतिरेकी, आणि अंमली पदार्थांची तस्करी या क्षेत्रीय धोक्यांवर चर्चा केली आणि या धोक्यांचा सामना करण्यासाठी सामायिक प्रयत्नांच्या शक्यतांवर चर्चा केली.