जगात कोरोना बाधितांची संख्या तीस कोटींवर

वॉशिंग्टन : युरोप,अमेरिकेनंतर आता भारतात देखील कोरोनाचे रुग्ण (Corona Patient) वाढत चालले आहेत. गेल्या चोवीस तासात जगभरात सुमारे २७ लाख रुग्णांना कोरोनाची लागण झाली आहे. तसेच ६३६९ जणांचा मृत्यू (Corona Death) झाला आहे. काल अमेरिकेत ८ लाख ४९ हजार जणांना तर फ्रान्समध्ये ३.२८ लाख जणांना कोरोना झाल्याचे निष्पन्न झाले. ब्रिटन, अर्जेंटिना, इटलीत देखील लाखापेक्षा अधिक रुग्णसंख्या आढळून आले आहे. (International Corona News)

जगभरात कोरोना रुग्णांच्या संख्येने ३० कोटींचा पल्ला पार केला आहे. डेल्टा आणि ओमिक्रॉनमुळे संसर्ग वेगाने पसरत आहे. कोरोनाच्या पहिल्या लाटेत सक्रिय रुग्णांचा आकडा हा दहा कोटी होता. पुढील सहा महिन्यांत हा आकडा वीस कोटींवर पोचला. त्याचवेळी दहा कोटी रुग्णसंख्या होण्यासाठी केवळ पाच महिन्यांचा कालावधी लागला होता. अमेरिकेच्या आरोग्य तज्ञांनी भारतात फेब्रुवारीत तिसरी लाट येण्याची शक्यता वर्तविली आहे. इन्स्टिट्यूट फॉर हेल्थ मेट्रिक्स ॲड इव्हॅल्यूशनचे संचालक ख्रिस्तोफर मरे यांच्या मते, फेब्रुवारीत भारतात कोरोनाचे दररोज पाच लाखांपेक्षा अधिक रुग्ण आढळून येतील. डेल्टाच्या तुलनेत ओमिक्रॉन व्हेरिएंट कमी धोकादायक राहील, असेही नमूद केले आहे.

अमेरिका, फ्रान्स आणि ऑस्ट्रेलियात रुग्णांच्या संख्येत विक्रमी वाढ झाली आहे. अमेरिकेचे प्रमुख आरोग्य तज्ञ डॉ. ॲथनी फॉसी यांनी म्हटले, की सक्रिय रुग्ण वाढले असले तरी अमेरिकेसह जगभरातील रुग्णांचा दवाखान्यात भरती होण्याचा दर हा कमीच राहिला आहे. दुसरीकडे ब्रिटनच्या आरोग्य अधिकाऱ्यांनी बूस्टर डोस ओमिक्रॉनविरोधात प्रभावी असल्याचे म्हटले आहे.

जगातील कोरोना स्थिती

३०.३७ कोटी

एकूण बाधित

२५.८२ कोटी

बरे झालेले

४ कोटी

सक्रिय रुग्ण

५४.९७ लाख

एकूण मृत्यू