युक्रेन आणि रशिया युद्धात इस्राईल करणार मध्यस्थी

जेरुसलेम : युद्धग्रस्त युक्रेन आणि रशिया यांच्यात शांतता निर्माण करण्यासाठी मध्यस्थी करणार असल्याचे इस्राईल सरकारने जाहीर केले आहे. आम्ही ही अत्यंत अवघड, पण आवश्‍यक जबाबदारी शिरावर घेतली आहे,’ असे इस्राईलच्या अध्यक्षीय प्रशासन विभागाचे प्रमुख आंद्रे येरमॅक यांनी ‘फेसबुक’च्या माध्यमातून सांगितले. युद्धावर तोडगा काढण्यासाठी अमेरिका आणि चीनदेखील प्रयत्नशील आहेत. मात्र दोन्ही देशांची भूमिका वेगवेगळी असल्याने त्यात किती प्रमाणात यश येईल, याबाबत साशंकता व्यक्त होत आहे.

युक्रेनला मदत, पण रशियाला विरोध नाही

युक्रेन-रशिया वादात इस्राईलने आतापर्यंत कोणत्याही देशाची बाजू घेतलेली नाही. त्यांनी युक्रेनला मानवतावादी दृष्टीकोनातून मदत म्हणून शंभर टन साहित्याचा पुरवठा केला असला तरी लष्करी साहित्य अजिबात पुरविलेले नाही. रशियाच्या हल्ल्यांमुळे होणाऱ्या हानीबाबत इस्राईल सरकारने वारंवार चिंता व्यक्त केली असली तरी रशिया सरकारचा निषेध मात्र केलेला नाही. शस्त्र टाकून युद्ध संपविण्याचा रशियाचे अध्यक्ष पुतीन यांचा निरोप इस्राईलचे पंतप्रधान नफ्ताली बेनेट यांनी युक्रेन सरकारला दिला होता. मात्र, युक्रेनने त्याकडे दुर्लक्ष केले, असा दावा इस्राईल सरकारने केला आहे.