जगावेगळे! तब्बल 12 वर्षांपासून 'ही' व्यक्ती रोज झोपते फक्त 30 मिनिटेच

टोकियो (जपान) : निरोगी शरीरासाठी दिवसातून किमान 7-8 तास झोपणं खूप महत्वाचं आहे. पण, जपानमध्ये राहणाऱ्या एका व्यक्तीनं हे खोटं ठरवलंय. तो, गेल्या 12 वर्षांपासून संपूर्ण दिवसांत फक्त 30 मिनिटे झोपतो आणि त्याचं शरीरही पूर्णपणे तंदुरुस्त आहे.

डेली स्टारमध्ये प्रसिद्ध झालेल्या वृत्तानुसार, या व्यक्तीचं नाव देसुकी होरी (Daisuke Hori) असं आहे. देसुकीनं सांगितलं, की पूर्वी तो दिवसाला 8 तासाहून अधिककाळ झोपायचा, पण हळूहळू त्यानं झोपेची वेळ कमी करण्यास सुरुवात केली आणि अवघे 30 मिनिटे तो झोपू लागला. गेली 12 वर्षे तो दिवसातून फक्त अर्धा तासच झोपत आहे.

देसुकी हा जपान शॉर्ट स्लीपर असोसिएशनचा (Japan Short Sleeper Association) अध्यक्ष असून त्यानं कमी झोपेनेही कसे तंदुरुस्त राहता येतं, याचे शेकडो लोकांना धडे दिले आहेत. या शिकवणीमुळे लोकांच्या जीवनशैलीत खूपच चांगला बदल झाल्याचे पहायला मिळतेय, असं तो सांगतो. त्याचं असं मत आहे, की जास्त वेळ झोपेला दिल्यामुळे काम कमी होतं, त्यामुळे त्यानं हा मार्ग स्वीकारलाय. जर, तुम्ही दिवसातून 8 तास झोपत असाल, तर तुम्हाला हवे ते मिळू शकत नाही. यानंतर त्याने झोपेचे तास कमी करण्यास सुरुवात केली. काही वर्षांच्या सरावानंतर, त्यानं आपली झोप कमी केली आणि आता तो फक्त 30 मिनिटे झोपतो.