Joe Biden : ज्यो बायडेन यांच्या पुत्राला होऊ शकते १७ वर्षांची शिक्षा; 'या' प्रकरणांमुळे अडचणींमध्ये वाढ

वॉशिंग्टनः अमेरिकेचे अध्यक्ष ज्यो बायडेन यांचे पुत्र हंटर बायडेन यांच्या अडचणीत भर पडत चालली आहे. कॅलिफोर्नियात करचुकवेगिरीच्या नऊ आरोपावर त्यांच्यावर गुरुवारी (ता.७) रात्री उशिरा अभियोग दाखल करण्यात आला.

या प्रकरणात हंटर दोषी आढळल्यास त्यांना १७ वर्षे तुरुंगावासाची शिक्षा होऊ शकते, असे विशेष वकील डेव्हिड विस यांनी सांगितले. डेलावरमध्ये २०१८ मध्ये बेकायदा बंदूक खरेदीच्या आरोपांव्यतिरिक्त हंटर यांच्यावर गुंडगिरीचे तीन आणि सहा दुष्कर्माचे आरोप ठेवले आहेत.

अमेरिकेत अमली पदार्थांचे सेवन करणारी व्यक्ती बंदूक किंवा अन्य कोणतेही शस्त्र बाळगू शकत नाही. पण आरोपांनुसार अमली पदार्थांच्या अमलाखाली असलेल्या हंटर बायडेन यांच्या बंदूक सापडली. अमेरिकी कायद्याचे उल्लंघन केल्याचा आरोप त्यांच्यावर आहे.

विशेष वकील डेव्हिड विस यांनी एका निवेदनात म्हटले आहे, की हंटर बायडेन यांनी कर भरण्याऐवजी विलासी जीवनशैलीवर लाखो डॉलर खर्च केले आहेत. हंटर यांनी २०१६ ते २०१९ या काळात सुमारे १४ लाख डॉलरची करचुकवेगिरी केल्याचा आरोप आहे. या काळात व्यसनाच्या आहारी ते गेले होते, हा आरोप त्यांनी कबूल केलेला आहे. हंटर यांची विशेष चौकशी सुरू राहील. बचाव पक्षाचे विस हे रिपब्लिकन पक्षाच्या पुढे झुकले असल्याचा आरोप वकील एब्बे लोवेल यांनी केला आहे.