अंधाधुंद गोळीबारातून बांग्लादेशी क्रिकेट संघ थोडक्यात वाचला

वेलिंग्टन - न्यूझीलंडमध्ये मशिदीत अंदाधुंद गोळीबार करण्यात आल्याची माहिती समोर आली आहे. ख्राईस्टचर्च येथे हा गोळीबार झाला आहे. गोळीबारात अनेकांचा मृत्यू झाल्याची भीती व्यक्त केली जात आहे. या गोळीबारातून बांगलादेश क्रिकेट संघ थोडक्यात बचावला आहे. 

दरम्यान, स्थानिक प्रसारमाध्यमांनी हल्लेखोराने केलेल्या गोळीबारात सहा जणांचा मृत्यू झाल्याचे वृत्त दिले आहे. संध्याकाळच्या प्रार्थनेनंतर जेव्हा मशिदीत गर्दी होती तेव्हा हा गोळीबार करण्यात आला. हल्ला केल्यानंतर हल्लेखोराने घटनास्थळावरुन पळ काढला असून, पोलिस त्याचा शोध घेत आहेत.

बांगलादेश क्रिकेट संघाच्या प्रवक्त्याने संपूर्ण संघ सुरक्षित असून, त्यांना मानसिक धक्का बसल्याची माहिती दिली आहे. सर्व खेळाडूंना हॉटेलमध्येच थांबण्यास सांगण्यात आले आहे.

stuff.co.nz या संकेतस्थळाने एका साक्षीदाराने दिलेल्या माहितीनुसार, आपण प्रार्थना करत असताना गोळीबार झाल्याचा आवाज ऐकला. बाहेर येऊन पाहिले असता आपली पत्नी रस्त्यावर मृत्यूमुखी पडलेली होती. दुसऱ्या एका व्यक्तीने आपल्या मुलांवर गोळीबार होताना पाहिल्याचे सांगितले. माझ्या आजुबाजूला सगळीकडे मृतदेह होते असेही त्यांनी सांगितले.

हल्लेखोराने लष्कर जवानांसारखे कपडे परिधान केले होते अशी माहिती आहे. मात्र अद्याप या माहितीला दुजोरा मिळालेला नाही. दरम्यान गोळीबारानंतर परिसरातील सर्व शाळा बंद करण्यात आल्या असून, लोकांना घराबाहेर न येण्याची सूचना करण्यात आली आहे. तसेच एखादी संशयास्पद हालचाल दिसल्यास पोलिसांना कळवण्याचे आवाहन करण्यात आले आहे.