Miami Alien : अमेरिकेतील शहरात फिरतोय दहा फुटांचा एलियन? व्हिडिओही समोर... काय आहे सत्य?

Miami Alien Video : अमेरिकेतील मियामी शहरात सध्या एक दहा फूट मोठा एलियन फिरत असल्याचं म्हटलं जातंय. एक्स या सोशल मीडिया प्लॅटफॉर्मवर याचे कित्येक व्हिडिओ सध्या व्हायरल होत आहेत. एका व्हिडिओमध्ये तर तेथील मॉलबाहेर पोलिसांचा मोठा ताफा दिसतो आहे. त्यामुळे हे पोलीस एलियनला पकडण्यासाठी आले आहेत, असंही म्हटलं जात आहे.

मात्र, हे सगळं खोटं असल्याचं आता स्पष्ट झालं आहे. एनबीसीने दिलेल्या रिपोर्टनुसार, मॉलबाहेर पोलिसांची गर्दी ही एलियनमुळे नव्हती. मॉलच्या बाहेर तरुणांच्या दोन गटामध्ये मारामारी झाली होती. त्यांना अटक करण्यासाठी हे पोलीस याठिकाणी दाखल झाले होते. हे सर्व तरुण अल्पवयीन होते असंही स्पष्ट झालं आहे. (Miami Mall Police)

एलियनची चर्चा कशामुळे?

सोशल मीडियावर सध्या काही व्हिडिओ व्हायरल होत आहेत. यामध्ये मियामीच्या रस्त्यांवर एक दहा फूट लांब एलियनसदृष्य गोष्ट (Miami Alien Video) चालताना दिसत आहे. यासोबतच, दुसऱ्या एका व्हिडिओमध्ये एका ठिकाणी अचानक काहीतरी चमकदार गोष्ट प्रकट होताना दिसत आहे. अर्थात, या व्हिडिओंची सत्यता अजूनही पुढे आलेली नाही. हे व्हिडिओ आणि त्यातील एलियन देखील फेक असण्याची शक्यता अधिक आहे.

एलियन म्हणजे परग्रहावरील जीव, जे पृथ्वीवर आले आहेत. आतापर्यंत कित्येक चित्रपटांमध्ये आणि कॉमिक्समध्ये एलियन्सनी पृथ्वीवर हल्ला केल्याचा उल्लेख आहे. परग्रहावर जीवन आहे का याबाबत अद्याप कोणताही ठोस पुरावा समोर आला नाही. मात्र एलियन खरे असल्याचा, यूएफओ पाहिल्याचा आणि एलियनला भेटल्याचा दावा करणारे कित्येक लोक वेळोवेळी समोर येत असतात. त्यातूनच अशा अफवांना बळ मिळतं.