युक्रेनचा निर्धार; रशियाबरोबर शस्त्रसंधी नाही! | Sakal
sakal

बोलून बातमी शोधा

NATO Determination of Ukraine No arms deal with Russia

युक्रेनचा निर्धार; रशियाबरोबर शस्त्रसंधी नाही!

किव्ह : रशियन सैनिक युक्रेनमध्ये असेपर्यंत शस्त्रसंधीची कोणतीही शक्यता नाही, असा निर्धार युक्रेन सरकारने आज व्यक्त केला. रशियाने पूर्वेकडील दोन्बास भागात हल्ले अधिक तीवे केले असल्याच्या पार्श्वभूमीवर युक्रेनने ही भूमिका स्पष्ट केली. रशियाने युक्रेनमधील इतर भागांवरील लक्ष कमी करून पूर्व भागावर तीव्र हल्ले सुरु केले आहेत. इतर अनेक भागांमध्ये युक्रेनी सैनिकांनी रशियाच्या सैनिकांना मागे लोटण्यात यश मिळविले आहे. यामुळे युक्रेनचा आत्मविश्‍वास दुणावला आहे. त्यामुळे रशियाने युक्रेनमधून पूर्ण माघार घेईपर्यंत शस्त्रसंधी करणार नसल्याचे युक्रेनने जाहीर केले आहे.

दुसरीकडे, रशियाने दोन्बास भागात तीव्र हल्ले सुरुच ठेवले आहेत. ‘नाटो’कडे सदस्यत्वासाठी अर्ज करणाऱ्या फिनलंडचाही नैसर्गिक वायूचा पुरवठा त्यांनी थांबविला आहे. या सर्व पार्श्वभूमीवर पोलंडचे अध्यक्ष आंद्रेज डुडा यांनी आज युक्रेनच्या संसदेत भाषण करत त्यांना पाठिंबा दर्शविला. युद्ध सुरु झाल्यापासून युक्रेनच्या संसदेमध्ये प्रत्यक्ष उपस्थित राहून भाषण करणारे ते पहिले विदेशी नेते ठरले आहेत.

फ्रान्सचा इशारा

युरोपीय महासंघात सहभागी होण्यास युक्रेनला किमान १५ किंवा २० वर्षे लागतील, असा इशारा फ्रान्सचे युरोपीय व्यवहार मंत्री क्लेमेंट बेयूने यांनी दिला आहे. ते म्हणाले की, आपल्याला प्रामाणिक राहावे लागेल. युक्रेन युरोपीय महासंघात पुढील सहा महिन्यांत, वर्षभरात किंवा दोन वर्षांत दाखल होणार असे तुम्ही म्हणत असाल तर तुम्ही खोटे बोलत आहात. त्यासाठी दीर्घ काळ लागतो.

युक्रेनी सैनिकांचे भवितव्य अंधारात

मारिउपोल शहरातील पोलाद प्रकल्पातील युक्रेनी सैनिकांना रशियाने युद्धबंदी बनविले असून त्यांचे भवितव्य अंधारात असल्याचा इशारा येथील माध्यमांनी दिला आहे. सुमारे अडीच हजार युक्रेनी सैनिकांना युद्धबंदी बनविले असल्याचे रशियाने जाहीर केले असून या सर्वांविरोधात कायदेशीर कारवाई करण्याचा रशियाचा विचार आहे. मारिउपोल शहर रशियाच्या ताब्यात गेल्याने या देशाला गेल्या तीन महिन्यांपासून हवा असलेला पहिला मोठा विजय मिळाला आहे.

यूट्युबकडून वाहिन्या बंद

युक्रेन युद्धाशी संबंधित ७० हजारांहून अधिक व्हिडिओ ‘यूट्युब’ आज त्यांच्या प्लॅटफॉर्मवरून काढून टाकले. तसेच, नऊ हजार वाहिन्याही बंद केल्या आहेत. मार्गदर्शक तत्त्वांचा भंग होत असल्याचे कारण देत कंपनीने ही कारवाई केली आहे. रशियाच्या युक्रेनवरील आक्रमणाचा ‘मुक्ती मोहिम’ असा उल्लेख केलेले व्हिडिओही काढून टाकण्यात आले आहेत. रशियामध्ये यूट्युब लोकप्रिय आहे.

Web Title: Nato Determination Of Ukraine No Arms Deal With Russia

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top