North Korea : अमेरिका-दक्षिण कोरिया जवळीक उत्तर कोरियाला सहन होईना; समुद्रात केली अण्वस्त्र चाचणी

अमेरिका आणि दक्षिण कोरियामध्ये संयुक्त लष्करी सराव काही दिवसांपूर्वीच पार पडला. यामुळे उत्तर कोरियाचा तिळपापड होत आहे. त्यामुळेच उत्तर कोरियाने शनिवारी अचानक टॅक्टिकल न्यूक्लिअर अटॅकची चाचणी केली. यामध्ये दोन मोठ्या रेंजच्या क्रूज मिसाईल समुद्रात डागण्यात आल्या. याव्यतिरिक्त आणखी काही मिसाईल्स फायर केल्याचंही म्हटलं जात आहे.

कोरियन द्विपकल्पाच्या पश्चिमी दिशेला असलेल्या समुद्रात या मिसाईल डागण्यात आल्या. यामध्ये डमी अण्वस्त्र देखील लोड करण्यात आलं होतं. उत्तर कोरियाने यावर्षी आतापर्यंत सर्वाधिक शस्त्रास्त्र चाचण्या पार पाडल्या आहेत.

किम जोंग यांचा दौरा

नॉर्थ कोरियाचे हुकूमशहा किम जोंग उन यांनी शस्त्रास्त्र आणि जहाज निर्मिती कारखान्यांनाही भेट दिली. उत्तर कोरिया आपल्या नौदलाची ताकद वाढवण्याचा सातत्याने प्रयत्न करत आहे. यासाठी किम जोंग संपूर्ण पूर्व सीमेवर दौरा करत आहे.

अमेरिका-दक्षिण कोरिया सराव

दरम्यान, अमेरिका आणि दक्षिण कोरियाचा संयुक्त लष्करी सराव नुकताच पार पडला. याला उल्ची फ्रीडम शील्ड असं म्हटलं जातं. गुरुवारी हा सराव पूर्ण झाला. या सरावाच्या आडून दक्षिण कोरिया आणि अमेरिका उत्तर कोरियाशी युद्धाची पूर्वतयारी करत असल्याचा आरोप यापूर्वी किम जोंग यांनी केला आहे.