ओमिक्रॉनपासून आशियायी देश सध्या सुरक्षित

तैपेई : ओमिक्रॉनपासून (Omicron Variant) आशियातील बहुतांश देश स्वत:ला सुरक्षित ठेवण्यास यशस्वी राहिले असले तरी उर्वरित जगात ओमिक्रॉनचा फैलाव वेगाने होत आहे. परंतु आगामी काळात जगातील सर्वाधिक लोकसंख्या असलेल्या भागात ओमिक्रॉनचे रुग्ण वाढण्याची शक्यता वर्तविली आहे.

परदेशातून येणाऱ्या नागरिकांना विलगीकरणात राहण्याची सक्ती आणि मास्क घालण्याचे बंधन यासारख्या नियमांमुळे कोरोना संसर्गाचा वेग कमी होण्यास हातभार लागला आहे. जपान, दक्षिण कोरिया आणि थायलंड येथे अलिकडेच परदेशातून आलेल्या प्रवाशांसाठी कडक नियम लागू केले होते. आता काही प्रमाणात शिथिलता देण्यात आली आहे. (Omicron Variant Effect on Asia Country)

आगामी काही महिने महत्त्वाचे राहू शकतात, असा इशारा तज्ञांनी दिला आहे. यासंदर्भात जपान सरकारचे आरोग्य सल्लागार डॉ. शिगेरू ओमी यांनी म्हटले की, एकदा का विषाणूचा वेग वाढला तर रुग्णसंख्या देखील तितक्याच वेगाने वाढू शकते. यावर्षी सुरवातीला कोविडचा उद्रेक झाल्यानंतर परिस्थिती पूर्वपदावर येत असताना भारतात, १.४ अब्ज लोकसंख्येच्या देशात ७०० पेक्षा अधिक लोकांत ओमिक्रॉन विषाणू आढळून आल्याने पुन्हा एकदा कोरोनाची धास्ती निर्माण झाली आहे.

ऑस्ट्रेलियात कोरोना रुग्णसंख्या नियंत्रित ठेवण्यासाठी युद्धपातळीवर प्रयत्न केले जात असताना गेल्या काही दिवसांत ओमिक्रॉनचा संसर्ग वेगाने वाढत चालला आहे. याशिवाय थायलंडमध्ये ७०० रुग्ण, दक्षिण कोरियात ५०० पेक्षा अधिक असून जपानमध्ये ३०० पेक्षा अधिक रुग्ण आहेत. चीनमध्ये सर्वाधिक कडक निर्बंध लागू असताना तेथे किमान ८ जणांना ओमिक्रॉन झाल्याचे सांगितले जात आहे.

तैवानमध्ये मास्क बंधनकारक

तैवानच्या प्रमुख शहरात मास्क घालणे बंधनकारक करण्यात आले आहे. त्याचबरोबर मॉडर्नाचा बुस्टर डोस देण्यास सुरवात झाली आहे. फायजर, ॲस्ट्राझेनेका आणि मॉडर्ना लशीचे बुस्टर डोस ओमिक्रॉनविरोधात पुरेशी सुरक्षा देऊ शकत नसले तरी प्रभावी ठरत आहेत.