पाकिस्तान : महागाईचा भडका; पेट्रोल पहिल्यांदाच होणार १५० रुपये लीटर

इस्लामाबाद - पाकिस्तान (Pakistan) गेल्या काही काळापासून महागाईचा सामना करत आहे. आता पाकिस्तानात पेट्रोल (Petrol) दरवाढीचा भडका उडण्याची शक्यता आहे. पाकिस्तान मीडिया न्यूज इंटरनॅशनलने दिलेल्या वृत्तानुसार, आंतरराष्ट्रीय बाजारात पेट्रोल आणि डिझेलच्या (Diesel) किंमतीमध्ये ५ रुपये प्रति लीटर वाढ करण्यात आली आहे. जर आंतरराष्ट्रीय बाजारातील तेलाच्या वाढत्या किंमतीचा भार ग्राहकांवर टाकण्याचा निर्णय घेतला गेल्यास १६ फेब्रुवारीपासून पेट्रोल आणि डिझेलच्या किंमती १३ ते १५ रुपये प्रति लीटर वाढण्याची शक्यता आहे.

द न्यूज इंटरनॅशनलच्या वृत्तानुसार, सध्या पाकिस्तानमध्ये पेट्रोलचा दर १४७.८३ रुपये प्रति लीटर इतका आहे. तर हायस्पीड डीझेल १४४.६२ रुपये प्रति दराने विक्री होत आहे. याआधी पाकिस्तानचे अर्थमंत्री शौकत तारिन यांनी पेट्रोलियम किंमती वाढण्याचे संकेत दिले होते. ते म्हणाले होते की, पाकिस्तानात इम्रान खान यांचे सरकार इंधन दरांना कमी ठेवू शकत नाही.

तारिन यांनी फेब्रुवारीच्या पहिल्या १५ दिवसांसाठी इंधन दर स्थिर ठेवण्याच्या निर्णयाविरोधात मत व्यक्त केलं होतं. त्यांनी म्हटलं होतं की, निर्णय लोकांसाठी चांगला असला तरी हे फार काळ चालणार नाही. येत्या वर्षाच्या अर्थसंकल्पाबाबत बोलताना त्यांनी म्हटलं होतं की, सरकारसमोर हे एक आव्हान आहे. आगामी निवडणुकांच्या पार्श्वभूमीवर सरकार पुढचा अर्थसंकल्प सादर करताना दबावाखाली असेल.