पाकिस्तानला मिळणार भारतीय कोविशील्डसह 4 कोटी 50 लाख लशींचे डोस

नवी दिल्ली - भारताचा शेजारी देश असलेला पाकिस्तान सीमेवर नेहमीच कुरापती करत असतो. सातत्यानं शस्त्रसंधीचं उल्लंघन करणं, दहशतवाद्यांना भारतात घुसखोरी करण्यासाठी मदत करणं यांसारखी कामे पाककडून सुरु असतात. दरम्यान, सध्या कोरोनाच्या संकटकाळात पाकिस्तानला भारताची मदत मिळणार आहे. भारतात तयार होणाऱ्या कोविशील्डसह जवळपास साडेचार कोटी डोस पाकिस्तानला मिळणार आहेत.

पाकिस्तान कोरोना व्हॅक्सिनसाठी चीनवर अवलंबून आहे. चीनी लशीचे दोन लाख 75 हजार डोस आतापर्यंत पाकिस्तानमध्ये देण्यात आले आहेत. आता पाकिस्तानात दुसऱ्या टप्प्यातील लसीकरण मोहिम सुरु होणार आहे. पाकिस्तान सरकार यंदा सात कोटी लोकांना कोरोना प्रतिबंधक लस देण्याची तयारी करत आहे. यानुसार पाकिस्तानच्या एनएचएसच्या सचिवांनी सांगितलं की, भारतात तयार होणारी ऑक्सफर्डची लस त्यांना मिळणार आहे. 

हे वाचा - उत्तराखंड : मुख्यमंत्र्यांचा संगीत खुर्चीचा खेळ कायम; 21 वर्षात एकाचाच कार्यकाळ पूर्ण

भारताकडून देण्यात येणारी ही कोरोना प्रतिबंधक लस द ग्लोबल अलायन्स फॉर व्हॅक्सिन अँड इम्युनायजेशन (GAVI) च्या माध्यमातून मिळणार आहे. ही संघटना गरीब देशांना कोरोना प्रतिबंधक लस देण्यासाठी तयार करण्यात आली आहे. 

पाकिस्तानच्या राष्ट्रीय आरोग्य सेवेचे सचिव आमिर अशरफ ख्वाजा यांनी लोक लेखा समितीला सांगितले की, देशाला भारताने तयार केलेली कोरोना प्रतिबंधक लस याच महिन्यात मिळेल. ख्वाजा यांनी म्हटलं की, आतापर्यंत पाकिस्तानात 2 कोटी 70 लाख जणांना कोरोना प्रतिबंधक लस देण्यात आली आहे. यामध्ये आरोग्य कर्मचारी आणि वरिष्ठ नागरिकांचा समावेश आहे.

हे वाचा - भाजपकडून रावत यांची अखेर गच्छंती; उत्तराखंडच्या मुख्यमंत्रीपदाचा दिला राजीनामा

पाकिस्तानने आतापर्यंत चार लशींसाठी नोंदणी केली आहे. यामध्ये सिनोफ्राम आणि कॅनसिने बायो या दोन चीनच्या लशींचा समावेश आहे. तसंच ब्रिटनमधील ऑक्सफर्ड-एस्ट्राजेनका आणि रशियाच्या स्पुटनिक व्ही या लशी आहेत. 

भारत पाकिस्तान यांच्यात लष्करी पातळीवर झालेल्या चर्चेनंतर 25 फेब्रुवारीला घोषणा करण्यात आली होती. त्यानंतर जम्मू काश्मीर आणि इतर क्षेत्रामध्ये नियंत्रण रेषेवर संघर्ष होऊ नये यासाठी कराराचे पालन काटेकोरपणे करण्यावर एकमत झाले होते.