Pakistan PM : शाहबाज नॉट सो शरीफ! पंतप्रधानांनी महिलेकडून हिसकावली छत्री, भर पावसात ठेवलं भिजत; व्हिडिओ व्हायरल

पाकिस्तानचे पंतप्रधान शाहबाज शरीफ हे सध्या पॅरिस दौऱ्यावर आहेत. मात्र, याठिकाणी घडलेल्या एका घटनेमुळे पुन्हा एकदा वादात अडकले आहेत. त्यांचा एक व्हिडिओ सध्या सोशल मीडियावर भरपूर व्हायरल होतोय. या व्हिडिओमुळे त्यांच्यावर भरपूर टीका होत आहे.

शहाबाज शरीफ हे सध्या ग्लोबल फायनान्सिंग पॅक्ट परिषदेसाठी दोन दिवसीय फ्रान्स दौऱ्यावर आहेत. गुरुवारी पॅरिसमध्ये दाखल झाल्यानंतर त्यांचे स्वागत करण्यात आले. मात्र, यावेळी त्यांनी एका महिलेकडून छत्री हिसकावल्यामुळे त्यांच्यावर मोठ्या प्रमाणात टीका होत आहे.

नेमकं काय घडलं?

पंतप्रधान शरीफ हे परिषदेच्या ठिकाणी पोहोचले, तेव्हा बाहेर मोठ्या प्रमाणात पाऊस सुरू होता. त्यामुळे त्यांना रिसीव्ह करण्यासाठी आलेल्या महिला स्वयंसेवकाच्या हातात छत्री होती. शरीफ गाडीतून उतरल्यानंतर ही स्वयंसेवक छत्री घेऊन त्यांच्या बाजूनेच चालत होती. मात्र, शरीफ यांनी तिच्या हातातून छत्री काढून घेत, पुढे एकट्यानेच चालायला सुरू केले. यामुळे ही स्वयंसेवक देखील गोंधळून गेली. अखेर, ती पावसात भिजतच त्यांच्या मागे येऊ लागली.

शहाबाज यांच्या या कृत्याचा व्हिडिओ पाकिस्तानी पंतप्रधानांच्या अधिकृत ट्विटर हँडलवरून पोस्ट करण्यात आला आहे. यावर ट्विटर यूजर्स मोठ्या प्रमाणात प्रतिक्रिया देत आहेत. शहाबाज यांनी केलेलं हे कृत्य आजिबात योग्य नसल्याचं नेटकरी म्हणत आहेत. तर, यातूनच त्यांचं चरित्र दिसून येतं, असंही एका ट्विटर यूजरने म्हटलं आहे.