...अन् पाकिस्तानचे पंतप्रधान येताच लोकांनी दिल्या 'चोर चोर' अशा घोषणा

पाकिस्तानचे पंतप्रधान शाहबाझ शरीफ सध्या सौदी अरब दौऱ्यावर आहेत. या दौऱ्यादरम्यान घडलेल्या एका घटनेचा व्हिडीओ सध्या सोशल मीडियावर व्हायरल होत आहे. शाहबाझ मदिना इथल्या मस्जिद-ए-नवाबीमध्ये प्रवेश करत होते. तेव्हा लोकांनी चोर-चोर असे नारे देण्यास सुरुवात केली. लवकरच नारेबाजी करणाऱ्यांना अटक करण्यात आली.

पाकिस्तानचे पंतप्रधान शाहबाज शरीफ आपल्या प्रतिनिधी मंडळासह तीन दिवसाच्या अधिकृत सौदी अरब दौऱ्यावर आहेत. त्यांच्यासोबत माहिती मंत्री मरियम औरंगजेब आणि राष्ट्रीय संसदेचे सदस्य शाहजैन बुगती यांचाही समावेश आहे. पाकिस्तानी माध्यमांनी दिलेल्या वृत्तानुसार, लोकांनी अशा प्रकारे विरोध करण्याला अप्रत्यक्षपणे इमरान खान जबाबदार असल्याचं मरियम औरंगजेब यांनी म्हटलं आहे.

औरंगजेब म्हणाल्या की, मी त्या व्यक्तीचं नाव घेऊ शकत नाही, कारण या पवित्र भूमीचा वापर मला राजकारणासाठी करायचा नाहीये. पण त्यांनी पाकिस्तानी समाजाला उध्वस्त केलंय.