फायझरच्या व्हॅक्सिनमुळे माणसाची होते मगर? ब्राझीलच्या राष्ट्राध्यक्षांचा विचित्र दावा

ब्राझीलिया - ब्राझीलचे राष्ट्रपती जैर ब्लोसोनारो यांनी कोरोना व्हायरसवरील व्हॅक्सिनविरोधातील भूमिका कायम ठेवली आहे. आता तर त्यांनी अमेरिकन कंपनी फायजरच्या व्हॅक्सिनवर शंका व्यक्त करताना खळबळजनक वक्तव्य केलं आहे. त्यांनी म्हटलं की, फायजरची व्हॅक्सिन लोकांना मगर किंवा दाढी असलेल्या महिला बनवू शकते. बोल्सोनारो यांनी सुरुवातीपासूनच कोरोनाला गांभीर्याने घेतलेलं नाही. देशात लसीकरणाला सुरुवात झाली असूनही त्यांनी आपण व्हॅक्सिन घेणार नाही अशी घोषणा केली आहे. 

ब्लोल्सोनारो यांनी गुरुवारी म्हटलं होतं की, फायजरसोबतच्या करारात स्पष्ट लिहिलं आहे की, ते कोणत्याही दुष्परिणामांसाठी जबाबदार नाहीत. जर तुम्ही मगर झालात तर ती तुमची अडचण असेल. ब्राझीलमध्ये व्हॅक्सिनची टेस्ट गेल्या अनेक आठवड्यांपासून सुरु होत्या. ब्रिटन आणि अमेरिकेच्या बाहेरील लोकांनाही कोरोनाची व्हॅक्सिन दिली जात आहे. बोल्सोनारो यांनी म्हटलं की, जर तुम्ही सुपरह्यूमन बनलात, महिलांना दाढी आली किंवा पुरुष महिलांच्या आवाजात बोलू लागले तर त्याची जबाबदारी कंपनी घेणार नाही. 

हे वाचा - Pfizer नंतर Moderna लशीलाही अमेरिकेकडून हिरवा कंदिल

देशात लसीकरण मोहिमेला सुरुवात करताना बोल्सोनारो यांनी सांगितलं की, व्हॅक्सिन फ्री असेल मात्र ते घेण्याचं बंधन नाही. देशात सर्वोच्च न्यायालायने व्हॅक्सिन घेणं गरजेचं असल्याचं म्हटलं असलं तरी लोकांवर याची सक्ती करता येणार नाही असंही मत नोंदवलं होतं. याचा अर्थ व्हॅक्सिन घेतलं नाही म्हणून लोकांना दंड केला जाऊ शकतो, सार्वजनिक ठिकाणी फिरण्यावर बंदी घालू शकतात पण जबरदस्तीने व्हॅक्सिन दिलं जाऊ शकत नाही. 

हेही वाचा - ‘गुगल’च्या मक्तेदारीला अमेरिकेत आव्हान;प्रभावाचा गैरवापर केल्याची टीका

ब्राझीलमध्ये 71 लाखांहून अधिक लोकांना कोरोनाची लागण झाली आहे. आतापर्यंत ब्राझीलमध्ये 1 लाख 85 हजारांहून अधिक लोकांचा मृत्यू झाला आहेत. ब्लोसोनारो यांनी सांगितलं की व्हॅक्सिनला ब्राझीलच्या अन्विसा संस्थेकडून सर्टीफिकेट मिळाल्यानंतर मला सोडून सर्वांना व्हॅक्सिन मिळू शकेल. मी व्हॅक्सिन घेणार नाही. ब्लोसोनारो यांनी जुलै महिन्यात कोरोनाची लागण झाली होती.