मायकल शुमाकरच्या मुलाचा भीषण अपघात; कारच्या उडाल्या ठिकऱ्या

फॉर्म्युला वन चॅम्पिअन मायकल शुमारकरचा मुलगा माईक शुमाकर याचा स्पर्धेदरम्यान भीषण अपघात झाला आहे. या अपघातात त्याची कार काँक्रिटच्या बॅऱिअरला धडकल्यानं कारच्या अक्षरशः ठिकऱ्या उडाल्या. पण यामध्ये तो आश्चर्यकारकरित्या बचावला आहे. (Formula One champion Michael Schumacher son tragic accident Car wreckage)

जेद्दाहमध्ये सुरु असलेल्या सौदी ग्रँड प्रिक्स क्वालिफाईंग राऊंडच्या दुसऱ्या सेशनमध्ये शनिवारी हास एफ १ टीमचा ड्रायव्हर असलेला माईक शुमाकरची अतिवेगात असलेली कार ट्रॅक सोडून काँक्रीटच्या बॅरिअरवर जाऊन आदळली. यामध्ये त्याच्या कारचे अक्षरशः तुकडे झाले, इतका हा भयंकर अपघात होता. या अपघातातून माईक मात्र बचावला आहे. फॉर्म्युला वन स्पर्धेच्या टीमनं ही माहिती दिली आहे. माईकचे वडील माईकल शुमाकर फॉर्म्युला वन स्पर्धेचा सात वेळा चॅम्पिअन राहिले आहेत.

अपघातानंतर माईकला अॅम्ब्युलन्समधून सर्किट मेडिकल सेंटरला नेण्यात आलं. स्काय स्पोर्ट्स टीव्हीनं सांगितलं की, माईकच्या कारचा स्पीड हा २७४ किमी प्रतितास इतका प्रचंड होता. दहाव्या वळणावर वळण घेत असताना त्याची कारण ट्रॅकच्या बाजूला असलेल्या काँक्रीटच्या बॅरिअरवर जाऊन आदळली. यानंतर कारचे तुकडे होऊन त्याचे अवशेष ट्रॅकवर पसरले होते. हे अवशेष दूर करण्यासाठी बराच काळ ही फेरी थांबवण्यात आली होती.