सुएझ कालव्यात अद्याप ट्रॅफिक जाम

इस्लामिया (इजिप्त) - इजिप्तच्या सुएझ कालव्यात अडकून पडलेले प्रचंड आकाराचे मालवाहतूक जहाज बाजूला करण्यात अद्यापही पूर्ण यश आले नसल्याने या कालव्यातून होणारा व्यापार ठप्प झाला आहे. कालव्यात तिरके होऊन फसून बसलेल्या ‘एव्हरग्रीन’ जहाजामुळे जवळपास १५० जहाजे खोळंबली आहेत.

- ताज्या बातम्यांसाठी डाऊनलोड करा ई-सकाळचे ऍप

पनामाचा झेंडा लावलेलेव जपानी उद्योगपतीच्या मालकीचे ‘एव्हरग्रीन’ हे जहाज मंगळवारी लाल समुद्रातून सुएझ कालव्यात शिरताच जोरदार वाऱ्यांमुळे बाजूला सरकले गेले आणि वाळूत रुतून बसले. हा मार्ग अत्यंत अरुंद असल्याने आणि हे जहाज जगातील सर्वांत मोठ्या जहाजांपैकी एक असल्याने जाण्या-येण्याचा मार्गच बंद पडला आहे. वाळू उपसा करून आणि इतर मार्गांनी जहाजाला मोकळे करण्याचे प्रयत्न सुरु असले तरी अद्याप त्यांना पूर्ण यश आलेले नाही. आतापर्यंत चारशे मीटर लांबीच्या या जहाजाच्या कडेच्या बाजूची वाळू उपसण्यात आली असून इतर बोटींच्या साह्याने जहाज ओढण्याचा प्रयत्न केला जात आहे. तोपर्यंत कालव्यातच खोळंबून पडलेल्या जहाजांना पुन्हा बंदरात पाठविण्यात आले आहे.  

- पुण्याच्या बातम्या वाचण्यासाठी येथे ► क्लिक करा

जहाजमालकाकडून माफीची याचना
‘एव्हरग्रीन’ जहाजाचे मालक शोई कायसेन यांनी या घटनेबद्दल चिंता व्यक्त करतानाच त्यामुळे अडचणीत आलेल्यांची माफी मागितली आहे. या जहाजाला बाजूला करण्यासाठी स्थानिक प्रशासनाला पूर्णपणे सहकार्य केले जात आहे. मात्र, जहाज अत्यंत मोठे असल्याने काम कठीण असल्याचेही त्यांनी स्पष्ट केले.

Edited By - Prashant Patil