तालिबान: अमरुल्लाह सालेहनी ट्विट करु नये म्हणून पंजशीरमध्ये केली इंटरनेट बंदी

काबूल: तालिबानने सध्या संपूर्ण अफगाणिस्तानवर ताबा मिळवला आहे. मात्र, अफगाणिस्तानातील एकमेव प्रांत पंजशीर मात्र त्यांना काबीज करता आलेला नाहीये. याच भागात तालिबानी विरोधकांनी आश्रय घेतला आहे. उपराष्ट्राध्यक्ष अमरुल्लाह सालेह यांच्यासोबत अफगाणिस्तानातील बंडखोर कमांडर अहमद शाह मसूद यांचा मुलगा अहमद मसूद सध्या पंजशीरमध्ये आहे. पंजशीर हा प्रांत सध्या तालिबान्यांची डोकेदुखी ठरला आहे.

पंजशीर आपल्या ताब्यात यावा, म्हणून तालिबान आटोकाट प्रयत्नात आहे, मात्र त्यात त्यांना यश मिळत नाहीये. एकीकडे गोळ्या-बंदूकीच्या माध्यमातून ताबा मिळवणाऱ्या तालिबानने आता नवा फंडा आजमावला आहे. तालिबानने पंजशीर खोऱ्यातील इंटरनेटची सेवा बंद केली आहे. याचं मुख्य कारण म्हणजे तालिबानला तगडी फाईट देण्याच्या हालचाली मुख्यत: याच भागात सुरु आहेत. माजी उपराष्ट्राध्यक्ष अमरुल्लाह सालेह यांना त्यांचं म्हणणं ट्विटरद्वारे मांडता येऊ नये म्हणून जाणीवपूर्क तालिबानने हे पाऊल उचललं आहे.

अमरुल्लाह सालेह हे अफगाणिस्तानचे माजी उपराष्ट्राध्यक्ष आहेत. त्यांनी स्वत:ला राष्ट्राध्यक्ष घोषित करुन तालिबानच्या विरोधात युद्ध पुकारलं आहे. ते सध्या पंजशीरमध्ये आहेत. तालिबानने अलिकडेच दावा केला होता की, त्यांनी पंजशीरमध्ये घुसखोरी केली आहे. मात्र पंजशीरने याचं खंडन केलं होतं.