अमेरिकेचा इशारा : अनेक लोकप्रतिनिधींचे रशियाकडून अपहरण | Sakal
sakal

बोलून बातमी शोधा

US warns Many MPs abducted by Russia eastern Ukraine Intrigue
अमेरिकेचा इशारा : अनेक लोकप्रतिनिधींचे रशियाकडून अपहरण

अमेरिकेचा इशारा : अनेक लोकप्रतिनिधींचे रशियाकडून अपहरण

किव्ह : युक्रेनच्या पूर्व भागाचा मोठा हिस्सा स्वत:मध्ये विलीन करून घेण्याचा रशियाचा इरादा असून या महिनाअखेरीपर्यंत ते आपली योजना अमलात आणू शकतात, असा इशारा अमेरिकेच्या एका वरीष्ठ अधिकाऱ्याने आज दिला. पूर्व भागातील दोन्बास या प्रदेशाच्या ८० टक्के भागावर सध्या रशियाचे नियंत्रण आहे.

युरोपमधील सुरक्षा आणि सहकार्य संघटनेमधील अमेरिकेचे राजदूत मायकेल कारपेंटर यांनी पत्रकारांशी बोलताना रशियाबाबत सावधानतेचा इशारा दिला आहे. ते म्हणाले,‘‘युक्रेनच्या पूर्व भागात रशियन भाषिकांची संख्या अधिक आहे. या बहुतांशी भागावर सध्या रशियाचे नियंत्रण आहे. हा भाग रशियामध्ये विलीन करण्याचा डाव आहे. या कृतीला कायदेशीर मान्यता असल्याचे दाखविण्यासाठी येथे सार्वमतही घेण्याचा रशियाचा विचार आहे. या पूर्व भागातील शहरांच्या महापौरांचे आणि लोकप्रतिनिधींचे अपहरण झाले असून इंटरनेट सेवाही बंद आहे. लवकरच येथे रशियाचा कायदा लागू केला जाण्याची शक्यता आहे.

मारिउपोलमध्ये बाँबवर्षाव सुरुच

मारिउपोल शहरात अडकलेल्या नागरिकांच्या सुटकेसाठी सुरक्षित मार्ग उपलब्ध करून दिल्यानंतरही रशियाचे रणगाडे या शहरात तोफगोळ्यांचा मारा करतच आहेत. यामुळे बचाव मोहिमेत अडथळे येत आहेत. या शहरातील नागरिकांना रशियाच्याच ताब्यातील गावांमध्ये हलविण्यात आले आहे. यातील काही जण युक्रेनच्या ताब्यातील गावांकडे रवाना झाले आहेत.

अमेरिकेचा अंदाज

मे अखेरीपर्यंत पूर्व युक्रेनचे विलीनीकरण करण्याचा डाव युक्रेनमधील खेरसन शहराला स्वतंत्र गणतंत्राचा दर्जा देण्याचा रशियाचा विचार

रशियाचे मोठे नुकसान

युक्रेनी सैनिनकांच्या चिवट प्रतिकारामुळे रशियाच्या सैन्याचे मोठे नुकसान झाले असून ते कमकुवत झाले आहे, असा दावा ब्रिटनच्या संरक्षण मंत्रालयाने केला आहे. रशियाची युद्धक्षमता घटत चालली असून त्यांच्यावर मोठा आघात केल्यास युद्धावर परिणाम होऊ शकतो, असे ब्रिटनने म्हटले आहे. रशियाने २००५ ते २०१८ या काळात संरक्षणावरील खर्चात मोठी वाढ केली असली तरी सैन्याचे आधुनिकीकरण करण्यात त्यांना अपयश आल्याचा दावाही करण्यात आला आहे.

Web Title: Us Warns Many Mps Abducted By Russia Eastern Ukraine Intrigue

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top