दररोज आठ लाख डॉलर खर्च करणारा हा आहे तरी कोण?

क्वालालंपूर - मलेशियातून हकालपट्टी झालेले माजी नेते नजीब रझाक यांचे इटलीमध्ये वास्तव्य असताना त्यांनी पंचतारांकित हॉटेलातील वास्तव्यावर कोट्यवधी डॉलर्सची उधळपट्टी केल्याचे समोर आले आहे. या हॉटेलातील रझाक यांचा एका दिवसाचा खर्च आठ लाख डॉलर एवढा होता, अशी माहिती न्यायालयीन सुनावणीतून पुढे आली आहे.

रझाक यांचे नाव याआधीही आलिशान जीवनशैलीमुळे चर्चेत होते. इटलीतील वास्तव्यामध्ये त्यांनी आणि त्यांच्या सहकाऱ्यांनी सरकारी तिजोरीतून मोठी उधळपट्टी केल्याचे समोर आले आहे. रझाक, त्यांचे कुटुंबीय आणि त्यांच्या वर्तुळातील अन्य काही व्यक्तींनी सरकारी तिजोरीतून कोट्यवधी डॉलर चोरल्याचा ठपका त्यांच्यावर ठेवण्यात आला आहे. मागील वर्षी मलेशियामध्ये झालेल्या निवडणुकीमध्ये रझाक यांना सत्ता गमवावी लागली होती. सत्ताच्युत होताच त्यांना अटक करण्यात आली होती, तसेच एप्रिलमध्ये त्यांच्याविरोधात खटलाही भरण्यात आला होता.

रझाक यांनी आरोप फेटाळले
सोमवारी झालेल्या सुनावणीदरम्यान बॅंक अधिकाऱ्यांनी दिलेल्या माहितीनंतर न्यायाधीशही अवाक्‌ झाले. रझाक यांनी त्यांच्याकडील दोन्ही क्रेडिट कार्डचा वापर करून इटलीतील एका पंचतारांकित हॉटेलामध्ये प्रत्येक दिवशी आठ लाख डॉलरची उधळण केल्याचे स्पष्ट झाले आहे. रझाक यांनी मात्र अन्य देशांच्या सरकारांमध्ये काम करणाऱ्यांसाठी ही एक साधारण भेट होती, असे सांगत या वारेमाप खर्चाचे आरोप फेटाळून लावले आहेत.