गर्भपाताचा अधिकार : अमेरिकेत महिला रस्त्यांवर उतरल्या

न्यूयॉर्क : अमेरिकेतील सर्वोच्च न्यायालयाने महिलांचा गर्भपाताचा घटनात्मक अधिकार काढून घेतल्यानंतर आज अनेक शहरांमध्ये महिला रस्त्यांवर उतरल्याचे चित्र पाहायला मिळाले. वॉशिंग्टनमध्येही महिलांनी आज जोरदार आंदोलन केले. अमेरिकेतील तब्बल पन्नास शहरांमध्ये आंदोलनाचा हा वणवा भडकला आहे. अमेरिकेतील जनमत हे गर्भपाताला कायदेशीर परवानगी द्यावी याच बाजूने असल्याचे दिसून येते. या निकालानंतर तेथील अनेक रुग्णालयांनी ताळे ठोकायला सुरूवात केली आहे. न्यायालयाच्या या आदेशानंतर तेथील अर्ध्यापेक्षा जास्त राज्ये गर्भपातावर नवे निर्बंध घालण्याच्या तयारीत आहेत.

सर्वोच्च न्यायालयाने शुक्रवारी तब्बल पन्नास वर्षांपूर्वीच्या रोव्ह विरुद्ध वेड या खटल्यामध्ये दिलेला ऐतिहासिक निकाल बाजूला ठेवतानाच महिलांचा गर्भपाताचा घटनात्मक अधिकार काढून घेतला होता. न्यायालयाच्या या निकालावर राजकीय वर्तुळातून देखील प्रतिक्रिया उमटू लागल्या आहेत. अमेरिेकेचे अध्यक्ष ज्यो बायडेन यांनी हा निकाल म्हणजे एक दुर्दैवी चूक असल्याचे म्हटले आहे. या निकालाविरोधात अमेरिकेमध्ये आज ठिकठिकाणी जोरदार आंदोलन करण्यात आले. फिनिक्स राज्यातील अॅरिझोना येथे आंदोलकांना पांगविण्यासाठी पोलिसांना लाठीहल्ला करावा लागला. लॉस एंजेलिसमध्येही आंदोलकांनी रस्त्यांवरील वाहतूक रोखून धरली होती.

रुग्णालये संकटात

अमेरिकेमध्ये सुरक्षित गर्भपात करणारी अनेक रुग्णालये होती, आता त्या सगळ्यांचाच व्यवसाय या निकालामुळे संकटात येणार आहे. ज्या महिलांनी गर्भपात करण्यासाठी आधीच रुग्णालयातून परवानगी घेतली होती, त्यांची नोंदणी देखील रुग्णालयाकडून रद्द करण्यात आली आहे.

संयुक्त राष्ट्रेही नाराज

अमेरिकेतील सर्वोच्च न्यायालयाच्या निकालावर संयुक्त राष्ट्रांच्या मानवाधिकार समितीने नाराजी व्यक्त केली आहे. न्यायालयाचा हा निकाल म्हणजे मानवी हक्क आणि लिंग समानतेला मोठा धक्का असून या निकालामुळे गर्भपात करू पाहणाऱ्या लोकांना रोखता येणार नाही, त्यामुळेच ही प्रक्रिया अधिक जीवघेणी ठरेल अशी भीती व्यक्त करण्यात आली आहे.