झूम कॉलवेळी ९०० कर्मचाऱ्यांना कामावरुन काढणाऱ्या सीईओला सक्तीची सुट्टी!

नवी दिल्ली : Better.com चे सीईओ विशाल गर्ग यांनी झूमवरील ऑनलाइन मिटिंगदरम्यान ९०० कर्मचाऱ्यांना कामावरुन काढून टाकलं होतं. हा व्हिडिओ कॉल सोशल मीडियात व्हायरलही झाला, त्यानंतर अनेकांनी यावर तीव्र प्रतिक्रिया दिल्या होत्या. या पार्श्वभूमीवर कंपनीच्या संचालक मंडळानं विशाल गर्ग यांच्यावर कारवाई केली असून तात्काळ सक्तीच्या रजेवर पाठवण्यात आलं आहे. Better.com ही डिजिटल मार्केटिंग कंपनी आहे. (Zoom call firing CEO Vishal Garg taking time off with immediate effect)

सोशल मीडियात झूम मिटिंगचा व्हिडिओ व्हायरल झाल्यानंतर आणि त्यावर सडकून टीका झाल्यानं सीईओ विशाल गर्ग यांनी अशा पद्धतीनं कर्मचाऱ्यांना कामावरुन काढून टाकल्याबद्दल दिलगिरी व्यक्त केली होती. आता गर्ग यांना सक्तीच्या रजेवर पाठवल्यानंतर कंपनीचे चीफ फानान्शिअल ऑफिसर केविन रियान कंपनीचे दररोजचं व्यवस्थापन पाहतील आणि संचालक मंडळाला रिपोर्ट करणार आहेत.

better.com कंपनीची स्थापना सन २०१६ मध्ये झाली असून याचं हेडक्वॉर्टर्स असून त्यांच्या ऑनलाइन मॉर्गेज आणि इन्शुरन्ससाठी काम करते. काही दिवसांपूर्वी झूम कॉलदरम्यान सीईओ विशाल गर्ग यांनी अमेरिका आणि भारतातील एकूण ९०० कर्मचाऱ्यांना घरचा रस्ता दाखवला होता. कॉस्ट कटिंगसाठी कंपनीनं हा निर्णय घेतला असल्याचं त्यांनी सांगितलं होतं.

कोण आहेत विशाल गर्ग?

विशाल गर्ग हे 'वन झिरो कॅपिटल' या होल्डिंग कंपनीचे संस्थापक सदस्य देखील आहेत. न्यूयॉर्क विद्यापीठातून पदवी प्राप्त केलेल्या गर्ग यांनी वयाच्या २१ व्या वर्षी 'मॉर्गन स्टॅनलीचा अॅनालिस्ट' प्रोग्राम सोडून प्रायव्हेट स्टुडंट लेंडर कंपनी 'माय रिच अंकल' सुरु केली होती. ही कंपनी सन २००५ मध्ये स्टॉक एक्स्चेंजमध्ये लिस्ट झाली होती. यानंतर या कंपनीला मेरिल लिंच यांनी खरेदी केलं होतं. यानंतर तिला बँक ऑफ अमेरिकानं टेकओव्हर केलं.