भारतीय पोषण खजिना : बहुगुणी तीळ

आपल्याकडे अनेक प्रकारच्या भाज्या, डाळी, कडधान्यं, फळं पिकतात. त्यांचे आरोग्यविषयक फायदे माहीत नसल्यानं किंवा फास्ट फूडच्या अति मार्केटिंगमुळे त्यांचा वापर भारतीय पदार्थांत कमी होत चालला आहे. त्यांचे फायदे तरुण पिढीला माहीत करून देणं आवश्यक आहे. अन्यथा, हा भारतीय पोषण खजिना लुप्त होण्याची भीती आहे. या मालिकेत आपण अतिशय पोषक भारतीय अन्नघटकांची माहिती करून घेत आहोत. आज आपण तिळाची (सेसमे सीड्स) माहिती करून घेऊ.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

• तिळाचा वापर करून तयार केलेल्या पदार्थांना भारतात ‘विंटर स्पेशल फूड’ असं म्हटलं जातं. 
• ते त्यांच्या तेलासाठी अतिशय मोलाचे असतात. तीळ म्हणजे छोट्या बिया असल्या, तरी त्यांचे फायदे मात्र प्रचंड असतात.
• पोषक असलेल्या तिळाचा तुम्ही तुमच्या डाळी, भात, नूडल्स किंवा इतर कोणत्याही पदार्थांमध्ये योग्य पद्धतीनं वापर करू शकता. तीळ योगर्ट किंवा स्मूदीमध्येसुद्धा मिसळून तुम्ही त्यांना खास अशी चव देऊ शकता. 

महत्त्वाचे घटक

• तिळामध्ये तांबे, मँगेनीझ, मॅग्नेशियम, कॅल्शियम, आयर्न, झिंक, सेलेनियम आदी खनिजं मोठ्या प्रमाणात असतात.
• तिळामध्ये असलेलं तांबे काही प्रमाणात संधिवातामुळे (ऱ्हुमॅटॉइड आर्थ्रायटिस) यांच्यामुळे होणाऱ्या वेदना आणि सूज कमी करण्यासाठी उपयोगी मानलं जातं.
• मॅग्नेशियममुळे रक्तवहिन्यांबाबतचं, श्वसनमार्गाबाबतचं आरोग्य सुधारतं आणि उच्च रक्तदाबही नियंत्रणात येण्यास मदत होते.
• तिळात कॅल्शियम आणि झिंक मोठ्या प्रमाणात असतं; ज्यामुळे हाडांची ताकद वाढण्यास मदत होते.

तिळाचे फायदे
एकुणात तिळाचे फायदे असे आहेत 
1) केसांची वाढ : तिळामुळे केसांची मुळं घट्ट होतात. तिळात असलेल्या ओमेगा फॅटी ॲसिड्समुळे केसांची वाढ उत्तम व्हायला मदत होते आणि केसांचं तुटणंही सुधारलं जातं. 

2) अँटी-एजिंग प्रॉपर्टीज : तिळामध्ये अँटीऑक्सिडंट्स खूप असतात; ज्यामुळे वार्धक्याच्या खुणा कमी होतात आणि त्वचा अधिक तरुण दिसायला लागते. 

3) त्वचेचं आरोग्य : तिळात असलेल्या तेलामुळे त्वचेला खूप उपयोग होतो. त्यामुळे त्वचा मऊ आणि नरम होण्यास मदत होते. सूज कमी करण्यासाठीचे घटक त्यात भरपूर असतात. 

4) पचनात सुधारणा : काळ्या तिळामध्ये फायबर्स आणि अनसॅच्युरेटेड फॅटी ॲसिड मोठ्या प्रमाणावर असल्यानं बद्धकोष्ठता कमी होण्यास मदत होते.

Edited By - Prashant Patil