थंडीत हात गार पडलेत, अशी घ्या काळजी

सध्या थंडी खूप वाढली आहे. अनेक ठिकाणी तर थंडीच्या लाटेमुळे पडलेल्या गारव्याने लोकांना नकोसे केले आहे. थंडीत (Cold) साधारणपणे हात-पाय (Hand)थंड पडणे, हाता-पायाला सुज येणे अशा समस्या दिसायला लागतात. थंडी असली तरी रोजच्या कामासाठी आपला पाण्यात हात जातोच. त्यामुळेही हात थंड पडतात. परिणामी बोट दुखायला लागतात. त्यामुळे काही गोष्टींची काळजी घेणे गरजेचे आहे.

-थंडी घालविण्यासाठी गरम पाणी किंवा चहा प्यायल्याने आराम मिळतो. आपण भांड किंवा कपातून ही पेये पित असताना हातालाही गरम लागते. त्यामुळे बोटांना हलके वाटते. तसेच तरतरी येते.

-मोहरीचे तेल आणि लसूण लावल्यानेही थंडीत हाता-पायांना आराम मिळतो. यासाठी आधी मोहरीचे तेल गरम करून त्यात लसूणच्या दोन पाकळ्या टाका. लगेच गॅस बंद करा. फक्त लसणीचा अरोमा तेलात उतरायला हवा. आता हे तेल हात आणि पायाला चोळा. यामुळे तुमच्या बोटांच्या दुखण्यापासून आराम मिळेल. तुमच्या बोटांचा कोरडेपणा जाण्यासाठी त्याचा फायदा होतो.

-नखं आणि बोटाची टोके घासूनही तुम्ही बोटांना थंडीपासून वाचवू शकता. थंडीत ज्यांची बोटे सुन्न होतात, त्यांच्यासाठी ही पद्धत खूप प्रभावी आहे. असे केल्याने हाताचा रक्तप्रवाह वाढेल आणि बोटे सक्रिय राहतील.

-हातमोज्यांचा वापर कधीही चांगला. मात्र ते घालण्याआधी त्यांना ब्लॅंकेटखाली किंवा ड्रॉवरखआली ठेवल्यावर आणखी उबदार होतील, त्याचा फायदा तुम्हाला होईल. याशिवाय तुम्ही लोकरीच्या, फ्लॅनेल आणि फ्लीस ग्लोव्ह्जचीही मदत घेऊ शकता. तुम्हाला या गोष्टी सहज बाजारात मिळतील.

- अंगात पाणी कमी असल्यानेही तुमचे हात पाय थंड पडतात. थंडीत लोकं कमी पाणी पितात, त्यामुळे ही समस्या उद्भवू शकते. यासाठी स्वतःला डिहायड्रेट होऊ देऊ नका अन्यथा शरीर आणखी थंड होऊ शकते.