वजन घटवायचंय? मग दररोज प्या कमी कॅलरीजचे 'हे' ज्यूस

सध्याच्या काळात प्रत्येक जण फिटनेस फ्रीक झाला आहे. त्यामुळे अनेक जण नियमितपणे वर्कआऊट, डाएट असं बरंच काही फॉलो करत असतात. मात्र, नियमितपणे या सगळ्या गोष्टी करणं अनेकांना शक्य होत नाही. त्यामुळेच अशा वेळी आपल्या दररोजच्याच आहारात असे काही किरकोळ बदल केले पाहिजेत ज्यामुळे वाढत्या वजनाला आळा बसू शकतो. म्हणूनच, वजन कमी करणारे व कमी कॅलरीज असलेले ज्यूस कोणते ते पाहुयात. (healthy-drink juices-that-are-very-low-in-calories)

१. गाजराचं ज्यूस -

गाजरामध्ये फायबर व व्हिटॅमिन ए चं प्रमाण जास्त असतं. तसंच त्यात कॅलरीजदेखील अत्यंत कमी असतात. त्यामुळे वजन कमी करणाऱ्या व्यक्तींनी आहारात नियमितपणे गाजराच्या ज्यूसचा समावेश केला पाहिजे. गाजराच्या ज्यूसमध्ये केवळ ३९ कॅलरीज असतात. त्यामुळे वजन झटपट कमी होण्यास मदत मिळते.

२. कारल्याचा ज्यूस -

कारलं म्हटलं की अनेक जण नाकं मुरडतात. परंतु, कारल्याच्या रसात १७ कॅलरीज असतात. त्यामुळे वजन नियंत्रणात राहण्यासोबतच मधुमेहींसाठीदेखील हा रस फायदेशीर आहे.

३. काकडीचा रस -

काकडीच्या रसामुळे फॅट बर्न होण्यास मदत मिळते. या रसात केवळ १६ कॅलरीज असतात. त्यामुळे वजन कमी करणाऱ्यांनी आहारात नियमितपणे काकडीचा रस घ्यावा.

४. आवळा ज्यूस -

आवळ्याच्या रसामुळे मेटाबॉलिज्म वाढण्यास मदत मिळते. तसंच फॅट जलद गतीने बर्न होतं. एक कप आवळ्याच्या रसात १५ कॅलरीज असतात.

५. डाळिंबाचा रस -

डाळिंबाच्या रसात ५४ कॅलरीज असतात. त्यामुळे वजन घटविण्यास याचा फायदा होतो. हा रस प्यायल्यामुळे पोट लवकर भरतं. तसंच त्वचेचा पोतदेखील सुधारतो.