Coronavirus Vs Monkeypox : सारखे की वेगळे? लक्षणं काय? जाणून घ्या...

जागतिक आरोग्य संघटनेनं मंकीपॉक्सला जागतिक आणीबाणी म्हणून घोषित केलं. हा आजार ७० देशांमध्ये पसरला असून जगभरात त्याचे १६ हजाराहून अधिक रुग्ण आढळून आले आहेत. तर पाच जणांचा मृत्यूही झाला आहे. भारतातही हा विषाणू आढळला असून याचे चार रुग्ण सापडले आहेत. या निमित्ताने कोरोना आणि मंकीपॉक्समधले काही ठळक फरक जाणून घ्या...

मंकीपॉक्स आणि कोरोना: दोन्ही विषाणूंचं स्वरुप काय?

मंकीपॉक्स आणि कोरोना हे दोन्ही अगदी वेगळे विषाणू आहेत. कोरोना विषाणू SARS-CoV2 यामुळे होतो. तर मंकीपॉक्स ऑर्थोपॉक्सो व्हायरस या पॉक्सविरिडी या प्रजातीतला आहे. ज्यामुळे कांजिण्याही होतात.

मंकीपॉक्स आणि कोरोना: दोन्हीची लक्षणं वेगळी असतात का?

मंकीपॉक्स आणि कोरोना या दोन्हीची लक्षणं काही अंशी सारखीच आहेत. मात्र त्यांची तीव्रता वेगवेगळी आहे.

कोरोनाची लक्षणं - ताप, थंडी, कफ, श्वास लागणे किंवा श्वास घेण्यात त्रास, थकवा, स्नायू किंवा अंगदुखी, डोकेदुखी, चव वास न लागणे, घसा खवखवणे, मळमळ, उलटी आणि जुलाब.

मंकीपॉक्सची लक्षणं - ताप, अंगदुखी, थंडी, थकवा, पुळ्या येणं, त्या दीर्घकाळ राहणं, अंगाची जळजळ

मंकीपॉक्स आणि कोरोना: दोन्ही विषाणू पसरतात कसे?

कोरोना - अगदी जवळून संपर्क आल्यानंतर बाधित व्यक्तीच्या नाकातून अथवा तोंडातून येणाऱ्या द्रावावाटे हा विषाणू पसरतो. शिंकल्याने, खोकल्याने, बोलल्याने किंवा श्वास घेण्यानेही हा विषाणू पसरतो.

मंकीपॉक्स - हा विषाणू थेट स्पर्शातून पसरतो. त्याशिवाय बाधित व्यक्तीचे कपडे वापरल्यानेही पसरतो. आत्तापर्यंत तरी हा विषाणू लैंगिक संबंधांतून पसरत असल्याचं मानलं जातंय.