Jalgaon : जिल्ह्यात कोरोनाचे 16 सक्रिय रुग्ण

जळगाव : गेल्या तीन महिन्यांपासून कोरोनामुक्त झालेल्या जळगाव जिल्ह्यात आठवडाभरापासून दररोज नवे कोरोना रुग्ण (Corona Patients) आढळून येत असून सक्रिय रुग्णांची संख्या आता सोळावर पोचली आहे. (16 active patients of Corona in district Jalgaon Corona updates News)

सौम्य स्वरूपाची तिसरी लाट ओसरल्यानंतर मार्चपासून जळगाव जिल्ह्यात कोरोना रुग्ण अभावानेच समोर आले. सक्रिय रुग्णसंख्या शून्यावर जाऊन जिल्हा कोरोनामुक्तही झाला. मात्र, आठवडाभरापासून पुन्हा रुग्ण आढळून येत आहेत. गेल्या तीन दिवसांत दररोज दोन नवे रुग्ण व दोन बरे झालेले रुग्ण असे प्रमाण होते. मात्र सोमवारी या रुग्णांत ६ नव्या रुग्णांची भर पडून २ रुग्ण बरे झाले. त्यामुळे सक्रिय रुग्णांची संख्या आता १६वर पोचली आहे. नव्या बाधितांमध्ये भुसावळला ३, यावल येथे २ व चोपड्यात १ असे रुग्ण आढळले.

गंभीर रुग्ण नाहीत

जिल्ह्यात सध्या १६ सक्रिय रुग्ण असून त्यापैकी एकही रुग्ण गंभीर स्वरूपाचा नाही. आयसीयू, व्हेंटिलेटर अथवा ऑक्सिजनवरही एकही रुग्ण नाही. सर्व १६ रुग्ण घरीच उपचार घेत असल्याचे सांगण्यात आले. त्यामुळे चिंतेचे कारण नसल्याचे वैद्यकीय तज्ज्ञांचे मत आहे.