Accident News: दुर्दैवी! घरात वाढदिवसाची तयारी सुरू असतानाच चिमुकलीचा मृत्यू

जळगावमध्ये दुख:द घटना समोर आली आहे. वाढदिवसाच्या दिवशी चिमुकलीचा मृत्यू झाला आहे. घरातील इतर सदस्य वाढदिवसाची जोरदार तयार करत होते, त्यावेळीच कुलरचा शॉक लागून मुलीचा दुर्दैवी मृत्यू झाला आहे. मुक्ताईनगरमधील सनान्से कुटुंबात ही दुर्दैवी घटना घडली आहे. या घटनेनंतर मुक्ताईनगर परिसरामध्ये हळहळ व्यक्त होतं आहे.

जळगाव जिल्ह्यातील मुक्ताईनगरमध्ये काल ही धक्कादायक घटना घडली आहे. जिजाईनगर भागातील प्रभाग क्रमांक 12 मध्ये राहत असणाऱ्या मुलीला कुलरचा शॉक लागल्यामुळे तिचा वाढदिवसाच्या दिवशीच दुर्दैवी मृत्यू झाला आहे.

मुलीचा नववा वाढदिवस असल्याने संपूर्ण कुटुंबीय वाढदिवस साजरा करण्याचे नियोजन करत होते. याच सुमारास कुलरचा जबरदस्त शॉक लागल्याने चिमुकलीचा मृत्यू झाला. वैष्णवी चेतन सनान्से असे या चिमुरडीचे नाव आहे.

या घटनेने सर्वत्र हळहळ व्यक्त होत आहे. वाढदिवसाच्या दिवशी ही घटना घडल्याने कुटुंबावर दुःखाचा डोंगर कोसळला आहे. केक कापण्यासाठी सगळे एकत्र आले, यावेळी वैष्णवी तयारी करून बसलेली होती. याचवेळी तिला कुलरचा तीव्र झटका बसला आणि त्यामुळे ती बेशुद्ध झाली. काही वेळात कुटुंबीयांनी तिला नजीकच्या रुग्णालयात दाखल केले. मात्र डॉक्टरांनी तिला मृत घोषित केले.