चंद्र- मंगळ पिधानयुतीचा शनिवारी अनोखा योग

जळगाव : चंद्र आणि मंगळाच्या पिधानयुतीचा अद्‌भूत आणि प्रेक्षणीय चमत्कार शनिवारी १७ एप्रिलला बघायला मिळणार आहे.

‘पिधानयुती’ हे पण एक प्रकारचे ग्रहणच असते. जसा सूर्य आणि पृथ्वी यांच्यामध्ये चंद्र आला की सूर्यग्रहण होते किंवा सूर्य आणि चंद्र यांच्यामध्ये पृथ्वी आली की चंद्रग्रहण होते तसेच मंगळ आणि पृथ्वी यांच्या मध्ये चंद्र आला की मंगळग्रहण होते या ग्रहणाला ‘पिधानयुती’ (Occultation) असे म्हणतात.

असा असेल योग

१७ एप्रिलला सायंकाळी ५.४७ मिनिटांनी या पिधानयुतीला म्हणजे चंद्र मंगळाच्या समोर यायला सुरवात होईल. सूर्य आकाशात असल्याने आपण ते बघू शकणार नाही. सूर्यास्तानंतर ज्यावेळी चंद्र आपल्याला दिसायला लागेल त्यावेळी चंद्राने मंगळाला पूर्ण झाकलेले असेल. साधारण ७ वाजून २१ मिनिटांनी मंगळ चंद्राच्या मागून हळूहळू बाहेर यायला लागेल. ७ वाजून २७ मिनिटांनी मंगळ पूर्णपणे बाहेर आलेला असेल आणि हेच ते प्रेक्षणीय दृश्य असेल. १२ तारखेला अमावस्या असल्याने १७ तारखेला चंद्राची कोर आणि मंगळ असे अदभूत दृश्य दुर्बिणीतून एकाच वेळी बघता येईल.

संपादन- भूषण श्रीखंडे