जळगाव : चोपड्याला ‘मॅमोग्राफी’ सुरू, जळगावात लवकरच

जळगाव : जिल्ह्यात दोन मेमोग्राफी (Mammography) मशीन आलेल्या आहेत. धरणगाव येथील मशीन जळगावमध्ये आणण्यात येणार आहे. मोहाडी येथील रुग्णालयात ठेवण्यात येईल. पुढील महिन्यात त्याद्वारे रुग्णांवर उपचार सुरू होणार आहेत. या मशीनमुळे स्तनाच्या गाठीचे निदान लवकर करता येते. एकूण कर्करोग रुग्णांमध्ये स्तनाचा कर्करोग असण्याचे प्रमाण २८ टक्‍क्‍यांपर्यंत पोचले आहे. त्यामुळे रुग्णांच्या हितासाठी हे मॅमोग्राफी मशीन खूप महत्त्वाचे आहे. गरीब व गरजू रुग्णांना याचा लाभ होण्यासाठी हे मशिन आहे, अशी माहिती जिल्हा शल्यचिकित्सक डॉ. एन. एस. चव्हाण यांनी दिली. चोपडा येथे मॅमोग्राफी मशीन सुरू झाली आहे. १० रुग्णांवर उपचार झाले आहे.

स्तनांतील गाठींचे निदान लवकर झाल्यामुळे उपचार करण्यामध्ये वैद्यकीय पथकाला सुलभता प्राप्त होते. रुग्णाचे आयुष्य सुधारते. कोरोना महामारीपूर्वी या मशीन खरेदी झाल्या आहेत. त्याची तांत्रिक मान्यता नाशिकचे आरोग्य विभागाचे उपसंचालक यांच्याकडून झाल्यानंतर प्रशासकीय मान्यता जिल्हाधिकाऱ्यांनी दिलेली होती. या मशीन धरणगाव, चोपडा येथे दिलेल्या आहेत. खरेदी झाल्यानंतर कोरोना महामारी सुरू झाल्यामुळे धरणगाव, चोपडा रुग्णालय कोविड रुग्णालय म्हणून घोषित झाले होते. त्यामुळे मशीन तेथेच होत्या.

आतापर्यंत १० रुग्णांवर उपचार

मॅमोग्राफी मशीन रुग्णहितासाठी खूप गरजेची आहे. यासाठी ई- टेंडर काढण्यात आले होते. जे न्यूनतम दर आले त्यानुसार पुरवठादारांना आदेश देण्यात आले. त्यानुसार मशीन खरेदी झाल्या होत्या. कोरोना महामारीनंतर आता सप्टेंबर महिन्यापासून चोपडा येथे मॅमोग्राफी मशीन सुरू झाली आहे. १० रुग्णांवर उपचार झाले असून २ जणांना बायोप्सीसाठी पाठविण्यात आले आहे. तेथे तज्ज्ञ डॉ. सोनाली जैन उपचार करतात. त्यासाठी येथील परिचारिका वर्गांना प्रशिक्षण देण्यात आले आहे.

कर्मचाऱ्यांचे प्रशिक्षण सुरू

जिल्ह्यात १२० ऑक्सिजन कॉन्सट्रेटर खरेदी करून रावेर मतदार संघातील उपजिल्हा रुग्णालयात वाटप करण्यात आले आहे. मशीनचे इंस्टॉलेशन करण्याचे काम सुरू असून तेथील कर्मचाऱ्यांना प्रशिक्षण देण्यात येत आहे.