Jalgaon : कोरोना रुग्णवाढीचा धोका तरी चाचण्या मर्यादितच

जळगाव : राज्यातील मुंबई, पुण्यासह अन्य शहरांमध्ये कोरोनाचे (Corona) रुग्ण वाढत असताना जळगाव शहरासह जिल्ह्यातही संसर्गाचा धोका वाढला आहे. मात्र, महापालिका प्रशासन अद्याप त्याबाबत सतर्क नाही. रुग्णवाढीचा धोका असतानाही जळगाव शहरात चाचण्यांची संख्या मर्यादितच आहे.

दरम्यान, यासंदर्भात आमदार सुरेश भोळे यांनी महापालिका आयुक्त डॉ. विद्या गायकवाड यांना निवेदन दिले असून वाढत्या रुग्णवाढीच्या पार्श्वभूमीवर जळगाव शहरात उपाययोजना राबविण्यासंदर्भात सूचना केल्या आहेत.

जळगाव ठरले होते ‘हॉटस्पॉट’

मार्च २०२०मध्ये राज्यात व जळगाव जिल्ह्यातही कोरोना महामारीने ‘एन्ट्री’ केली. पहिल्या व दुसऱ्या लाटेत सर्वाधिक जीवितहानी महाराष्ट्रात झाली. पहिल्या दोन्ही लाटांमध्ये जळगाव शहर हॉटस्पॉट ठरले होते. तिसरी लाट त्या तुलनेत अगदीच सौम्य होती.

...तरीही उदासीनता कायम

गेल्या काही दिवसांपासून राज्यात कोरोनाचा संसर्ग वाढतोय. मुंबई, पुणे, ठाणे, नाशिक, पालघर आदी शहरांत रुग्णवाढ मोठी असून या सर्व शहरांचा प्रवाशांच्या माध्यमातून जळगावशी मोठा कनेक्ट आहे. त्यामुळे जळगाव शहरासह जिल्ह्यात रुग्णवाढीचा धोका निर्माण झाला आहे. असे असताना महापालिकेकडून अद्याप चाचण्या वाढविण्यात आलेल्या नाहीत.

पंधरा-वीसच चाचण्या

सध्या जळगाव शहरात महापालिकेचे एकमेव चाचणी केंद्र शासकीय तंत्रनिकेतन येथे सुरु आहे. त्याठिकाणी दिवसभरात केवळ १५-२० चाचण्या होत आहेत. सध्या शहरात दोनच सक्रिय रुग्ण आहेत. रुग्ण वाढू लागल्यानंतर चाचण्यांची केंद्र वाढविण्यात येतील, असे सांगितले जात आहे.

आमदारांच्या सूचना

आमदार सुरेश भोळेंनी यासंदर्भात महापालिका आयुक्तांना पत्र दिले आहे. महापालिकेच्या माध्यमातून कोरोनाच्या चाचण्या वाढविण्यात याव्या. प्रत्येक प्रभागात सर्वेक्षण करून १०० टक्के लसीकरण करण्यावर भर द्यावा, यासह अन्य सूचना भोळेंनी केल्या आहेत.