जळगाव : कोरोना रुग्णसंख्येचा आलेख वाढता

जळगाव : जिल्ह्यात जानेवारीच्या पहिल्या तारखेपासून असलेला कोरोना रुग्णसंख्येचा(corona patient) आलेख गुरुवारीही वाढताच होता. गुरुवारी दिवसभरात जिल्ह्यात नव्या ४६ रुग्णांची नोंद झाली. या वाढत्या संख्येने जिल्ह्यातील सक्रिय रुग्णसंख्येने तीन महिन्यांनंतर प्रथमच शंभरी पार करत १३६चा आकडा गाठला.

जळगाव जिल्ह्यात जुलै २०२१नंतर रुग्णसंख्या झपाट्याने घटली. ऑक्टोबरनंतर सक्रिय रुग्णांची संख्या शंभराच्या खाली गेली. मात्र, आता जानेवारीच्या पहिल्या तारखेपासून तिसऱ्या लाटेला सुरवात होऊन रुग्णसंख्येचा आलेख वाढायला लागला आहे.(Jalgaon news)

तब्बल ४६ रुग्ण

गुरुवारी दिवसभरात जळगाव जिल्ह्यात तब्बल ४६ नव्या रुग्णांची नोंद झाली. यात जळगाव शहरातील १५, भुसावळ २१, अमळनेर २, धरणगाव व रावेर प्रत्येकी १, चाळीसगाव ३ असे रुग्ण आढळून आलेत. आज आरटीपीसीआरच्या ४९२ अहवालांपैकी ३० तर एन्टीजेनच्या १२४८ चाचण्यांच्या अहवालातून १६ रुग्ण बाधित आढळले. एकूण १७४० चाचण्यांचे अहवाल प्राप्त झालेत. यामुळे जिल्ह्यातील सक्रिय रुग्णसंख्या १३६ झाली असून त्यातील १२२ रुग्ण लक्षणे नसलेले व केवळ १४ रुग्णांमध्ये लक्षणे आहेत. सद्य:स्थितीत केवळ एक रुग्ण ऑक्सिजनवर आहे. तर आयसीयूत एकही रुग्ण नाही.