स्वस्त सोने खरेदीचे आमिष पडले महागात; दाम्पत्याला साडेचार लाखांचा चुना

जळगाव : शहरातील पिंप्राळा येथील रहिवासी तथा एम.जे.कॉलेजमध्ये शिपायी पदावर कार्यरत सुभाष रामदास लोखंडे (वय-५४) यांना अनोळखी भामट्यांनी ४लाख २० हजारांचा गंडा घातला आहे. खोदकामात सोन्याची माळ सापडल्याचा बहाणा करुन त्यांना नकली सोने विकून फसवणुक केल्याप्रकरणी जिल्‍हापेठ पोलिस ठाण्यात गुन्ह्याची नोंद करण्यात आली आहे.

जळगाव शहरातील विश्वदिप कॉलनीतील सुभाष रामदास लाखंडे (वय, ५४) कुटुंबीयांसह वास्तव्यास आहेत. सेामवार (ता.१३) रोजी लोखंडे दाम्पत्य शहरातील बी.जे.मार्केट येथे खरेदीला गेले असतांना दुपारी एका अनोळखी व्यक्तीने त्यांना गाठून चांदीचे नाणे दाखवले. खोदकामात आम्हाला हे सर्व सापडले असून अत्यल्प किंमतीत देण्याचे आमिष दाखवले तसेच सापडलेल्या सोन्यापैकी माळेतील एक मणी सराफाकडून तपासण्याचे सांगत दोघांच्या सोबत दिला. हा मणी घेवून लोखंडे दाम्पत्याने थेट सराफा दुकान गाठले. त्यांच्या तपासणीत हा मणी शुद्ध सोन्याचा असल्याचे सांगण्यात येताच त्यांचा विश्वास बसला. परिणामी त्यांनी चक्क ४ लाख २० हजार रुपयांचे सोनं खरेदी करण्याचा निर्णय घेत या अनोळखी भामट्यांना संपर्क केला. बोलणे झाल्यावर त्यापैकी एकाने देवाण-घेवाणीसाठी अंजिठा चौकात बोलावून घेतले. तेथून एका निर्जन स्थळावर घेवुन जात लोंखडे यांच्याकडून साडेचार लाख रुपये रोख घेवून त्यांना नकली सेाने देत पोबारा केला.

सोनार तोच..सोने मात्र नकली
लोखंडे यांनी ४लाख २० हजार रुपयांची रोकड देत त्या अनोळखी व्यक्तीकडून सोन्याची माळ घेतली. ही माळ घेवून मणी तपासुन देणाऱ्या सराफाच्या दुकानात सुभाष लोखंडे पत्नीसह दाखल झाले. सोन्याची माळ मोडण्यास आल्याचे सांगत ती सराफाच्या हातात दिली. कसोटीवर घासून बघताच ही माळ नकली असल्याचे सांगताच लोखंडे यांना धक्का बसला. तात्काळ त्यांनी जिल्‍हापेठ पोलिस ठाणे गाठून तक्रार दिली. रात्री याबाबत गुन्ह्याची नोंद करण्यात आली. पुढील तपास पोलिस नाईक मनोज पवार करत आहेत.