सध्याचा संसर्ग अल्फा, डेल्टा, ओमिक्रॉनचे संमिश्र स्वरूप | Corona

जळगाव : ओमिक्रॉनचा संसर्ग प्रचंड वाढेल, अशी शक्यता असताना सध्या बाधितांमध्ये आढळून येणारा कोरोना (Corona) व्हायरस ओमिक्रॉन (Omicron) नसून तो अल्फा (Alpha), डेल्टा (Delta) व ओमिक्रॉनचे संमिश्र स्वरूप असल्याचा दावा केला जात आहे. जिल्ह्यात आतापर्यंत ओमिक्रॉनचे दोनच रुग्ण समोर आले असून ते महिनाभरापूर्वी बरेही झाले आहेत.

दैनंदिन रुग्णसंख्येला आता ‘ब्रेक’

देशात व राज्यात कोरोनाची तिसरी लाट आल्यानंतर जळगाव जिल्ह्यात जानेवारीच्या पहिल्या आठवड्यापासून कोरोना बाधितांची संख्या वाढू लागली. डिसेंबरअखेर दहाच्या आत सक्रिय रुग्णसंख्या होती, ती जानेवारीत वाढून साडे तीन हजारांवर पोचली. जळगाव जिल्ह्यात वाढू लागलेल्या संख्येने मोठा आकडा गाठेपर्यंतच दैनंदिन रुग्णसंख्येला आता ‘ब्रेक’ लागला असून स्थिती नियंत्रणात आली. या लाटेत ओमिक्रॉनचा संसर्ग झपाट्याने वाढून जानेवारी अखेर पंधरा हजारांवर सक्रिय रुग्ण होतील, असा अंदाज होता. मात्र, वेळेच्या आतच ही तीव्रता कमी झाली.

ओमिक्रॉनचे दोन रुग्ण बरे

गेल्या डिसेंबरमध्येच ओमिक्रॉनचे रुग्ण समोर येत होते. त्यामुळे त्यावेळी आढळून येणाऱ्या बाधितांच्या स्वॅबचे नमुने जिनोम सिक्वेंसिंगसाठी पाठविण्यात येत होते. त्यानुसार डिसेंबरमध्ये दोन ओमिक्रॉन बाधित समोर आले, ते त्याच आठवड्यात बरेही झाले. संबंधित रुग्ण ओमिक्रॉन बाधित असल्याचा अहवाल ते बरे झाल्यानंतर तीन आठवड्यांनी प्राप्त झाला. सध्या आढळून येणाऱ्या रुग्णांमध्ये ओमिक्रॉन व्हेरिएंटचा अंश नसल्याचे मानले जात आहे.

संसर्ग संमिश्र व्हेरिएंटचा

सध्या जळगाव जिल्ह्यात आढळून येणाऱ्या कोरोना बाधितांचे सर्वच नमुने जिनोम सिक्वेंसिंगसाठी (Genome sequencing) पाठविण्यात येत नसले तरी ठरावीक नमुने पाठविण्यात येत आहे. त्यात ओमिक्रॉनचा संसर्ग नसल्याचे समोर येत आहे. मात्र, सध्याच्या रुग्णांमध्ये आढळून येणारा संसर्ग अल्फा, डेल्टा व ओमिक्रॉनचे संमिश्र स्वरूप असल्याचा तज्ज्ञांचा दावा आहे. चिकित्सालयीन पद्धतीने केलेल्या अभ्यासातून ही बाब समोर आली आहे. या संमिश्र व्हेरिएंटचा संसर्ग गंभीर स्वरूपाचा नसल्याचेही मानले जात आहे.

‘डेल्टा’चा धोका कायम

सध्याच्या बाधितांमध्ये अगदीच सौम्य स्वरुपाची लक्षणे आढळून येत आहेत. ९५ टक्के रुग्णांमध्ये तर लक्षणेही दिसून येत नाहीत. हा व्हेरिएंट उर्ध्व श्‍वसनसंस्थेवर (upper respiratory system) आघात करतो. या उलट दुसऱ्या लाटेत सर्वाधिक जीवितहानी करणारा ‘डेल्टा’ व्हेरिएंट खालच्या श्‍वसनयंत्रणेवर (lower respiratory system) अर्थात, थेट फुफ्फुसात आघात केल्याचा अनुभव आहे. त्यामुळे ‘डेल्टा’पासून धोका कायम आहे.

''सध्या बाधितांमध्ये संमिश्र स्वरुपाच्या व्हेरिएंटचा संसर्ग दिसून येत असला तरी ‘डेल्टा’ अद्याप कायम आहे. त्यामुळे मधुमेह, रक्तदाब, दम्याच्या रुग्णांनी काळजी घेणे गरजेचे आहे. दोन-तीन दिवस सलग ताप असेल तर तातडीने चाचणी करून घेतली पाहिजे.'' - डॉ. किशोर इंगोले (विभागप्रमुख, जीएमसी प्रयोगशाळा)