जळगाव : आठ इमारती, दहा घरे जमीनदोस्त करणार

जळगाव : महापालिकेतर्फे मेहरूण भागातील नाल्याचे अतिक्रमण हटविण्याची गुरुवारी (ता. ६) मोठी मोहीम राबविण्यात येणार आहे. यात आठ दुमजली इमारती व दहा घरे काढण्यात येणार आहेत. पोलिस बंदोबस्तात ही कारवाई होणार आहे.(Jalgaon Municipal Corporation)

मेहरूण भागात वाहत असलेल्या नाल्यात मोठ्या प्रमाणात अतिक्रमण झाले आहे. हे अतिक्रमण काढून नाल्यावर संरक्षक भिंत बांधण्यात येणार आहे. त्यामुळे हा नाला वाहता होऊन पूर आल्यास कोणतेही नुकसान होणार आहे. महापालिकेकडे या नाल्यावरचे अतिक्रमण काढण्याचा प्रस्ताव गेल्या अनेक दिवसांपासून प्रलंबित होता. मात्र, त्याबाबत कारवाई केली जात नव्हती, यासाठी महापालिकेला मोठ्या प्रमाणात पोलिस बंदोबस्तही आवश्‍यक होता. त्यानुसार पोलिसांनी बंदोबस्त देण्याची तयारी दाखविली आहे.(Jalgaon news)

खदाण ते महादेव मंदिर कारवाई

मेहरूण भागातील खदाण ते महादेव मंदिर भागात वाहत असलेल्या नाल्यावरील अतिक्रमण काढण्याची कारवाई होणार आहे. याबाबत माहिती देताना अतिक्रमण विभागाचे सुनील ठाकूर यांनी सांगितले, की हा नाला ३० फूट आहे. मात्र, अतिकम्रणामुळे तो २२ फूट झाला आहे. त्यामुळे पावसाळ्यात त्याला अनेक वेळा पूर येतो. नाल्यात मोठ्या प्रमाणात अतिक्रमित बांधकाम करण्यात आले आहे. ते काढण्यात येणार आहे. अतिक्रमणाबाबत नागरिकांनाही माहिती देण्यात आली आहे. त्यांनीही अतिकम्रण काढण्याची तयारी दर्शविली आहे. या कारवाईत आठ दुमजली इमारती व १० घरे काढण्यात येणार आहेत. सकाळी नऊला अधिकाऱ्यांच्या उपस्थितीत ही कारवाई करण्यात येणार आहे.

पोलिस बंदोबस्त

महापालिकेतर्फे करण्यात येणाऱ्या कारवाईस पोलिस प्रशासनाने बंदोबस्त दिला आहे. सहाय्यक पोलिस अधीक्षक कुमार चिंथा यांनी बुधवारी (ता. ५) या भागाची पाहणी केली आहे. त्यानुसार त्यांच्या नेतृत्वाखाली पोलिस बंदोबस्त देण्यात येणार आहे.