जळगाव : NMU अंतर्गत बहि:स्थ अभ्यासक्रमांच्या परीक्षा

जळगाव : कवयित्री बहिणाबाई चौधरी उत्तर महाराष्ट्र विद्यापीठाद्वारा (NMU) घेण्यात येणाऱ्या शैक्षणिक वर्ष २०२१-२२ मधील उन्हाळी २०२२ च्या नियमित व बहि:स्थ विविध अभ्यासक्रमांच्या लेखी परीक्षा ऑफलाइन पद्धतीने वस्तुनिष्ठ बहुपर्यायी स्वरूपात (एमसीक्यू) सुरू झाल्या आहेत.

विद्यापीठ अधिकार मंडळाने घेतलेल्या निर्णयानुसार उन्हाळी २०२२ परीक्षांची कार्यपद्वती व परीक्षेच्या स्वरूपाबाबत तसेच त्यातील वस्तुनिष्ठ बहुपर्यायी स्वरूपात ऑफलाइन परीक्षांसाठी फोटोकॉपी व पुनर्मूल्यांकनाची सुविधा उपलब्ध राहणार नाही, असे विद्यापीठाने यापूर्वीच संलग्न महाविद्यालयांना कळविण्यात आले होते. (Exams for External Courses under NMU jalgaon latest Marathi news)

तथापि, विद्यार्थ्यांचे शैक्षणिक हित विचारात घेऊन ऑफलाइन पद्धतीने वस्तुनिष्ठ बहुपर्यायी स्वरूपात ओएमआर उत्तरपत्रिकेवर घेण्यात आलेल्या या परीक्षेसाठी गुणपडताळणीची सुविधा उपलब्ध करून देण्यात येत आहे.

ज्यांना गुणपडताळणी करावयाची आहे, अशा विद्यार्थ्यांनी ऑनलाइन अर्ज सादर करावयाचा आहे. विद्यापीठाच्या www.nmu.ac.in या संकेतस्थळावर अर्ज उपलब्ध आहे. परीक्षेचा निकाल जाहीर झाल्यापासून २१ दिवसांपर्यंत विहित मुदतीनंतर प्राप्त होणारे अर्ज स्वीकारले जाणार नाहीत.