Jalgaon News : शेतकऱ्याने बांधावरच घेतला गळफास

Jalgaon News : अलवाडी (ता. चाळीसगाव) येथील ४५ वर्षीय शेतकऱ्याने शेताच्या बांधावरील लिंबाच्या झाडाला गळफास घेऊन आत्महत्या केली. ही घटना बुधवारी (ता. १२) सकाळी उघडकीस आली. आत्महत्येचे कारण अद्याप स्पष्ट झालेले नाही. या प्रकरणी मेहुणबारे पोलिस ठाण्यात अकस्मात मृत्यूची नोंद करण्यात आली आहे. (farmer hanged himself on field Jalgaon News)

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

अलवाडी (ता. चाळीसगाव) येथे सुरेश राजधर बागूल (वय ४५) हे पत्नी व दोन मुलांसह राहतात. त्यांच्याकडे ५ एकर शेती आहे.

बुधवारी (ता.१२) सकाळी साडेसातच्या सुमारास रवींद्र रामचंद्र बागूल हे शेतात वीजपंप सुरू करण्यासाठी गेले असता त्यांच्या शेताजवळील पप्पू पाटील यांनी सुरेश याने शेताच्या बांधावर असलेल्या लिंबाच्या झाडाला गळफास घेतल्याचे सांगितले.

रवींद्र बागूल यांनी त्या ठिकाणी जाऊन पाहिले असता सुरेश बागूल हे झाडाला गळफास घेतलेल्या अवस्थेत आढळून आले. या घटनेची माहिती पोलिसांना देण्यात आली. त्यानंतर बागूल यांचा मृतदेह खाली उतरवून तो विच्छेदनासाठी मेहुणबारे ग्रामीण रूग्णालयात नेण्यात आला.

या प्रकरणी रवींद्र बागूल यांनी दिलेल्या माहितीवरून मेहुणबारे पोलिस ठाण्यात आकस्मिक मृत्यूची नोंद करण्यात आली आहे.