Jalgaon Eknath Khadse : एकनाथ खडसे यांना दाऊदच्या नावाने जीवे मारण्याची धमकी

Jalgaon News : राज्याचे माजी मंत्री आमदार एकनाथ खडसे यांना दाऊद इब्राहिम व छोटा शकील यांच्या नावाने जीवे मारण्याच्या धमकीचे फोन आले असल्याची माहिती खडसे यांनी स्वतः दिली. या प्रकरणी त्यांनी मुक्ताईनगर पोलिसांत तक्रार केली असल्याचेही सांगितले. याबाबत श्री. खडसे यांनी सांगितले. (Jalgaon Death threat to Eknath Khadse in name of Dawood)

की सोमवारी (ता. १५) व मंगळवारी (ता. १६) सायंकाळपर्यंत साधारणत: पाच वेळा एक अमेरिकेतून, तर काही उत्तर प्रदेश भागातून मोबाईलवर धमकीचे फोन आले. त्यात दाऊद आणि छोटा शकील यांच्या नावाचा उल्लेख आहे. यात म्हटले आहे, ‘आप की खैर नही है, आपको मारना है’ अशा प्रकारचा उल्लेख आहे. मी त्यांना विचारले, की माझा काय संबंध?

तर त्यावर ते म्हणाले, ‘हमने तय किया है, की आपको मारना है.’ मला वाटलं, कुणी तरी खोडसाळपणा करीत असेल म्हणून मी लक्ष दिले नाही; परंतु वारंवार असे फोन येत राहिल्याने मी पोलिसांना सूचित केले आहे. मागे मनोज भंगाळे नावाच्या व्यक्तीने माझे दाऊदच्या पत्नीशी संभाषण असल्याचे सांगितले होते. त्या वेळी ते फोन कॉल दिले होते, ते कराचीचे होते. (Latest Marathi News)

अशाच प्रकारचा फोन कॉल अमेरिकेतून असू शकतो. संगणकाचा वापर करून अशा प्रकारचे फोन कॉल तुम्हाला नाउमेद करण्यासाठी खोडसाळपणा केला जात असेल, असे मला प्रथमदर्शनी वाटले; परंतु सारखेच कॉल येत असल्याने आपण पोलिसांना कळविले. धमकी देणाऱ्याने आपल्याला काहीही मागितले नाही, मात्र हा खोडसाळपणा असावा.

आता तंत्रज्ञान इतके प्रगत झाले आहे, की मुक्ताईनगरात बसूनही अमेरिकेचा कॉल करू शकतो. हे राजकीय आहे की त्यामागे आणखी काय असावे, हे पोलिस तपासात समोर येईल, असेही खडसे यांनी सांगितले.