Jalgaon Municipality News : महापालिका प्रभारी आयुक्त, मक्तेदारात वाद

Jalgaon News : दहा दिवसांपासून बिलांच्या फाइल टेबलावरच ठेवून त्याचा निपटारा न केल्याने महापालिकेत मक्तेदार व प्रभारी आयुक्तांमध्ये शाब्दीक चकमक झाली. महापालिकेच्या आयुक्त डॉ. विद्या गायकवाड यांची नुकतीच बदली झाली. त्यांच्या आयुक्तपदाचा प्रभारी पदभार महापालिकेच्या अतिरिक्त आयुक्त पल्लवी भागवत यांच्याकडे शासनाकडून देण्यात आला आहे. (Jalgaon Municipality News)

मात्र एक आठवडा उलटूनही फाइलींचा निपटारा होत नसल्याच्या मक्तेदारांकडून तक्रारी आहेत. याबाबत मक्तेदार सूरज नारखेडे यांनी शुक्रवारी (ता.२९) प्रभारी आयुक्त पल्लवी भागवत यांची भेट घेऊन संताप व्यक्त केला. या संदर्भात मंत्रालयातील वरिष्ठांकडे आपली तक्रार का करू नये? असे म्हणताच प्रभारी आयुक्त भागवत आणि मक्तेदार नारखेडे यांच्यात जोरदार शाब्दीक वाद झाला.

मक्तेदार नारखेडे यांनी यासंदर्भात नगरविकास विभागाच्या अवर सचिवांकडे भ्रमणध्वणीवर संपर्क साधून तक्रार केल्याची माहिती समोर आली आहे. मक्तेदार नारखेडे यांनी सांगितले, की आपण बिलांच्या फाइलसाठी वारंवार भेटलो आहोत. मात्र त्याबाबत कोणतीही कार्यवाही झाली नाही. (latest marathi news)

महापालिकेत गेले आठ दिवस केवळ प्रशिक्षण सेंटरच सुरू आहे. त्यामुळे कोणतीही कामे होत नाहीत. त्यामुळे आपण संताप व्यक्त करून वरिष्ठांना भ्रमणध्वनी वरून याची माहिती दिली आहे. सक्षम अधिकाऱ्याकडे पदभार सोपवावा, अशी मागणीही केली आहे.

"महापालिकेत मार्च अखेरची कामे सुरु आहेत. त्यामुळे शासकीय निधीच्या कामांना प्रथम प्राधान्य द्यावे लागत आहे. निधी व्यपगत होऊ नये, यासाठी प्रयत्न सुरु आहेत. माझ्याकडे अतिरिक्त आयुक्त पदाचा पदभाराबरोबरच प्रभारी आयुक्त पदाची जबाबदारी आहे. नियमानुसार शासकीय कामांना प्राधान्य देत आहे. सर्वच मक्तेदारांच्या फाइल प्रलंबित असून मार्च अखेरची कामे झाल्यानंतर या फाइल काढण्यात येतील."- पल्लवी भागवत, प्रभारी आयुक्त, महापालिका जळगाव