HSC Exam 2024 : बारावीच्या परिक्षा आजपासून; जिल्हा प्रशासनातर्फे तयारी पूर्ण

Jalgaon News : उच्च माध्यमिक शालांत परिक्षा (बारावी) बुधवार (ता.२१) पासून सुरू होत आहे. यंदा बारावीसाठी जिल्ह्यात ४८ हजार २७३ परीक्षार्थी आहेत. कॉपी मुक्त परीक्षेसाठी आठ भरारी पथके नियुक्त केली आहेत. जिल्हा प्रशासनाने सर्वच परिक्षा केंद्रावर बंदोबस्त ठेवला आहे. पोलिस, होमगार्ड यांची मदत घेण्यात आली आहे. (HSC Exam start from today)

बारावीच्या परिक्षेसाठी २७ हजार ७६८ मुले तर २० हजार ५०५ मुली असे एकूण ४८ हजार २७३ परीक्षार्थी आहेत. या परिक्षेसाठी ७८ परिक्षा केंद्र आहेत. नेमलेल्या आठ भरारी पथकात प्राथमिक विभाग, माध्यमिक विभाग, महिला अधिकारी, आदी विभागाची पथके तयार करण्यात आली आहेत. एका पथकात सात ते आठ अधिकारी आहेत.

शाखा निहाय विद्यार्थी असे -

विज्ञान शाखा : २५ हजार ३१२

कला : १६ हजार २४४

वाणिज्य : ५ हजार १६१

व्यावसायीक : १ हजार ५२३

आयटीआय : ३२

एकूण : ४८ हजार २७३

असे आहेत पेपर

२१ फेब्रुवारीपासून बारावीची परिक्षा सूरू होत आहे. पहिला पेपर इंग्रजीचा आहे. २२ ला हिंदी, २३ ला मराठी, २४ ला मराठी प्राकृत/संस्कृत, २६ ला वाणिज्य संघटन, २७ ला भौतिकशास्त्र, २८ ला गृहव्यवस्थापन, २९ फेब्रुवारीला रसायनशास्त्र, २ मार्चला गणित, ४ ला बालविकास, कृषी विज्ञान, ५ ला सहकार, ६ मार्चला जीवशास्त्र विषयाचा पेपर आहे.

"जिल्ह्यात बारावीची परिक्षा २१ फेब्रुवारीपासून सूरू होत आहे. आपण कॉपी मुक्त परिक्षा अभियान राबवीत आहोत. विद्यार्थ्यांनी परिक्षा शांततेत व कॉपी न करता द्यावी. पर्यवेक्षक, केंद्र चालकांनीही कॉपीला प्रोत्साहन देवू नये.

परिक्षा केंद्राच्या पाचशे मिटर परिसरातील फोटोकॉपीची दुकाने परिक्षा काळात बंद राहतील. पोलिस, होमगार्ड यांनीही कॉपीमुक्त अभियान यशस्वी करावे."- आयुष प्रसाद, जिल्हाधिकारी