जळगाव : जिल्हा ग्रामीणसह उपजिल्हा रुग्णालयांचे फायर ऑडिट

जळगाव : जिल्ह्यातील ग्रामीण रुग्णालयांसह उपजिल्हा रुग्णालयाचे फायर ऑडिट झाले आहे. त्यासाठी सुमारे पाच कोटींचा खर्च झाला आहे. या खर्चाला सार्वजनिक बांधकाम विभागाची एनओसी मिळालेली नसल्याने संबंधितांना खर्च देण्यात आलेला नाही.

अहमदनगर येथील जिल्हा रुग्णालयाला शनिवारी (ता. ६) शॉटसर्किटने आग लागून अकरा जणांचा मृत्यू झाला. या पार्श्वभूमीवर जिल्हा रुग्णालयासह ग्रामीण रुग्णालय, उपजिल्हा रुग्णालयांचे फायर ऑडिट झाले आहे की नाही, याबाबत माहिती घेतली असता, वरील बाब समोर आली.

जिल्हा शल्यचिकित्सक डॉ. एन. एस. चव्हाण यांच्या अधिपत्याखाली येणाऱ्या ग्रामीण रुग्णालय, उपजिल्हा रुग्णालयात शासनाच्या आदेशाद्वारे फायर ऑडिट करण्यात आले होते. त्यातील त्रुटी दूर करून त्या जागी नवीन यंत्रणा बसविली होती. मुक्ताईनगर, जामनेर, जामनेर, चोपडा या ठिकाणी उपजिल्हा रुग्णालय आहे. तर ग्रामीण रुग्णालये अकरा आहेत. त्यात फायर ऑडिट करून आग लागली तर कशामुळे लागेल, ती लागू नये, यासाठी कोणत्या योजना आहेत किंवा कराव्या लागतील, याबाबत निरीक्षण करून योजना कार्यान्वित करण्यात आल्या. यामुळे सर्व ग्रामीण रुग्णालय व उपजिल्हा रुग्णालये आगीच्या धोक्यापासून दूर आहेत. या सर्व ठिकाणच्या ऑडिटसाठी पाच कोटींचा खर्च आला आहे. टेंडर मंजुरीसाठी शासनाकडे पाठविले होते. त्यांनी बांधकाम विभागाकडून याबाबत एनओसी घेऊन शासनाकडे पाठविणे, निधी आला की पेमेंट अदा होईल, असे सांगण्यात आले आहे.

जिल्हा रुग्णालय व शासकीय वैद्यकीय महाविद्यालयाचे फायर ऑडिट मार्च, एप्रिलमध्येच डॉ. जयप्रकाश रामानंद यांच्या कार्यकाळात झाले. त्यांनी डॉ. श्रीकृष्ण चव्हाण, डॉ. डॅनियल साजी, डीन कार्यलयाचे राजेंद्र वैद्य यांचे पॅनल बनविले होते. राज्य शासनाकडून एक टीम आली तिने हे ऑडिट पूर्ण केले होते.

जिल्ह्यातील ग्रामीण रुग्णालय, उपजिल्हा रुग्णालयांचे फायर ऑडिट पूर्ण झाले आहे. आगीपासून या रुग्णालयांना धोका नाही. ज्यांनी ऑडिट केले, त्यांचे टेंडर शासनाकडे पाठविले आहे. शासनाकडून निधी आल्यावर पेमेंट अदा केले जाईल.

- डॉ. एन. एस. चव्हाण, जिल्हा शल्यचिकित्सक